Nga Boldnews.al
Për pushtet edhe historinë e kthen përmbys, për propagandë, edhe Heroin Kombëtar Gjergj Kastrioti Skënderbeu ka ndërmend ta trazojë. Vizita e presidentit Turk Rexhep Taip Erdogan në Shqipëri është planifikuar më datë 17 janar, pikërisht në ditën e përkujtomores së vdekjes së Skëndërbeut, 17 janar 1468. Të jetë vetëm një rastësi? Rama nuk i lë asgjë rastësisë.
Vizita e Erdogan pritet të shoqërohet me ceremoni shtetërore nën dirigjimin e Ramës për të pritur mikun e tij Erdogan, i cili i është gjendur në ditë të “vështira” që Rama të mbajë pushtetin, e madje të rrëmbejë edhe një mandat të tretë qeverisës.
Ndërsa “topat” do gjëmojnë në nder të Edogan, në sallat e mbyllura do mbahet ndonjë referat në përkujtimim të Heroit Kombëtar, Gjergj Kastrioti (Skënderbeu). Nuk është ai Skënderbeu i Elisës, por i vërteti, ai që të paktën historisë sonë të zymtë i ka ngjizur krenarinë.
Rama do të bëjë gëzuar me Erdoganin, do lëshojë batuta ndërsa ndodhet në inagurimin e shtëpive të ndërtuara nga qeveria turke, pas tërmetit të 26 nëntorit 2019. Turqizimi brenda anadallokave qeveritarë nuk është risi, për aq kohë sa kreu i qeverisë shqiptare vizitat “jashtë shtetit” i konsideron udhëtimet e shpeshta drejt Turqisë.
Nuk ka mbetur as pa kthyer kusurin nga mbështetja që i ka bërë Erdogan, duke ndërhyrë direkt edhe në zgjadhjet në vendin tonë, kur në prag të tyre dërgoi vaksina kundër Covid-19, investime në ndërtimin e banesave për të prekurit nga Tërmeti dhe Spitalin Memorial në Fier. Si shpërblim Turqia po merr “tokën e lirë” për të pasur ndikimin e saj në ekonomi, arsim, politikë apo deri në ndikim fetar. Disa xhami janë marrë në “administrim” nga qeveria turke për tu rikonstruktuar, përfshi edhe atë emblematike si Xhamia e Plumbit në Shkodër.
Gjithashtu organizata “FETO”, që nga Erdogan cilësohet si ekstremiste po venitet gjithnjë e më shumë në Shqipëri, ku nuk kanë munguar as rastet e deportimeve të shtetasve turq duke u shkelur konventat ndërkombëtare të të drejtave të njeriut. Erdogan nuk do e ketë vizitën e fundit në Shqipëri, po as Rama sigurisht që do e vizitojë Turqinë, por ardhja e Erdogan në përkujtimoren e Heroit tonë Kombëtar le një shijë të hidhur, kur pushteti trazon edhe të shkuarën e historisë së vendit.
Për 25 vite Skënderbeu u bë barriera e Perandorisë Osmane për të mësyrë në Perëndim, ndërsa heroi Kombëtar tashmë përdhoset nga politika. Ndonëse jemi pesë shekuj më pas, historia nuk mund të zhbëhet, qoftë edhe për politikën ditore të kreut të qeverisë që për mikun Erdogan, nuk e ka problem që të venisë ditën përkujtimore të ndarjes nga jeta të Skënderbeut. Turqia sot, si pjesë përbërëse e Perandorisë Osmane po tenton rikthimin e një neootomanizmi dhe terreni më i përashtashëm gjendet në Shqipëri, politikat e së cilës nën pushtetin e Ramës po i kthen sytë nga Stambolli…
Pak javë më parë ambasadori turk në vendin tonë u shpreh se Osmanët kishin ardhur në Shqipëri jo si pushtues, por si çlirimtarë. Ky provokim kaloi lehtë nga qeveria, që as e gjeti të udhës që të paktën të mbante një deklaratë. Për tulla dhe llaç që na i dhuroi Erdogani i Ramës përmbyset një histori.
