I dënuar me 4 vite burg, ekstradohet pjesëtari i grupit që transportonte shqiptarë në SHBA dhe Angli

Shpëtim Kiri, 63 vjeç, është ekstraduar drejt vendit tonë nga Gjermania, njoftoi këtë të Mërkurë policia.

Shpëtim Kiri është dënuar nga Gjykata e Posaçme si pjesë e një grupi që çonte qytetarë në në Angli dhe në SHBA kundrejt vlerave monetare nga 8 deri në 12 mijë euro. Sipas hetimeve, grupi në fjalë realizonte martesa fiktive me shtetase dhe shtetas bullgarë, në mënyrë që shqiptarët që kishin paguar për udhëtimin drejt SHBA-ve apo Anglisë, të pajiseshin me dokumente të huaja dhe të mbërrinin në destinacion.

Shtatë persona u dënuan nga gjykata si pjesë e grupit.

“Shpëtim Kiri ka qenë pjesë e një grupi të strukturuar kriminal (ka pasur rolin e transportuesit), i cili u godit në kuadër të operacionit policor ‘GARANTUESIT’, zhvilluar në vitin 2018, në DVP Shkodër, ku pas dokumentimit me prova ligjore u arrestuan 9 shtetas dhe u shpallën në kërkim 2 të tjerë.

Këtë shtetas, Gjykata e Posaçme Kundër Korrupsionit dhe Krimit të Organizuar, në korrik të vitit 2020, e ka dënuar me 4 vite, 2 muaj e 14 ditë burgim, për veprat penale ‘Ndihma për kalim të paligjshëm të kufirit më shumë se një herë e kryer në kuadër të grupit të strukturuar’ dhe ‘Grupi i strukturuar kriminal”, njoftoi policia.

LEXO EDHE  'Medet për këtë popull, tre ditë dimër mbyllen shkollat se ngrohje s'ka'