Nga Boldnews.al
Policia e Shtetit ka përdorur metoda “fine” për të shmangur fillimisht arrestimin në flagrancë të deputetit të Partisë Demokratike, Gazmend Bardhi, dhe më tej për ta mbajtur larg hetimeve nga Struktura e Posaçme Kundër Anti-Korrupsionit (SPAK), pas episodeve të ndodhura paraditen e së shtunës së kaluar në selinë e subjektit politik opozitar.
Burime nga Policia e Tiranës konfirmuan për “Boldnews.al” se, pas veprimeve të kryera në vijim të protestës së demokratëve, ka referuar të gjithë materialin në Prokurorinë e Tiranës, përfshirë edhe rastin e deputetit Bardhi, i cili dyshohet për “Shkelja e rregullave mbi lëndët plasëse” dhe “Stërvitja për përdorimin e paligjshëm të lëndëve të rrezikshme”.
Vepra e parë parashikon dënimin me burgim nga 1 deri në 5 vjet. Ndërsa vepra e dytë parashikon burgosjen nga 2 deri në 7 vjet.
Gazmend Bardhi ka cilësi të veçanta si deputet dhe kompetent për hetimet ndaj tij është Prokuroria Speciale. Për këtë arsye, Policia e Shtetit duhet të referonte materialet pranë SPAK-ut.
Por, Policia Gjyqësore ka gjetur një rrugë të butë për trajtimin e rastit “Bardhi”, duke e përcjellë në Prokurorinë e juridiksionit të përgjithshëm të kryeqytetit.
Tashmë, rasti është në dorë të prokurorëve të Tiranës, të cilët kanë dy rrugë proceduriale-të vendosin mosfillimin, nëse nuk konstatojnë përfshirje të deputetit Gazmend Bardhi në veprat penale, të cilat i atribuohen; ose të përcjellë çështjen për hetime të mëtejshme pranë SPAK-ut, si struktura kompetente që trajton procedimet penale ndaj zyrtarëve me funksion deputet.
Në çdo rast, Policia e Shtetit arriti të sfumojë dyshimet ndaj ligjvënësit Bardhi, për të cilin kishte dyshime për kryerjen e veprave penale, në bazë të të cilave duhet të vepronte menjëherë me arrestin në flagrancë.
Deri më tani, janë të pakta të dhënat e publikuara nga Policia lidhur me veprimet e mundshme aktive të Gazmend Bardhit për shkelje të rregullave mbi lëndët plasëse dhe stërvitjen për përdorimin e lëndëve të paligjshme.
Megjithatë, në rast se Policia ka arritur të mbledhë prova për konsumimin e veprave penale nga Bardhi, çdo vonesë e sjellë prej veprimeve të saj mund të ndihmojë deputetin të zhdukë apo të fsheh fakte.
Të shtunën e 8 Janarit të vitit 2021, disa persona të gjendur brenda godinës së Partisë Demokratike përdorën një lëndë, ende të paidentifikuar shkencërisht, kundër një grupi të madh demokratësh që kërkojnë largimin e Lulzim Bashës nga godina e subjektit politik.
Shumë protestues pretenduan se lënda e përdorur kundër tyre ishte gaz lotsjellës, duke paraqitur publikisht edhe disa bombola, të cilat, sipas tyre, janë hedhur nga brenda godinës nëpërmjet armëve të posaçme.
Ndërkohë, Lulzim Basha, Gazmend Bardhi dhe të tjerë deputetë të Partisë Demokratike, të cilët atë ditë gjendeshin brenda ambjenteve të selisë, pretendojnë se nuk është përdorur gaz lotsjellës, por protestuesit janë stopuar me bombolat fikëse të zjarrit.
Deputetë, pjesë e Komisionit të Rithemelemit të Partisë Demokratike, me formim mjekësor, por edhe mjekë të ndryshëm, janë cituar në media të shprehen se edhe gazi i fikëseve të zjarrit është shumë i dëmshëm për shëndetin e njerëzve dhe, me raste, edhe fatale për individët që kanë sëmundje polmonare apo të zemrës.
Gjithësesi, ekspertizat pritet të përcaktojnë llojin e lëndës së përdorur kundër protestuesve dhe më tej edhe dëmet që shkaktojnë në shëndetin e personave.
Në rast se konstatohet se ato përfshihen në llojin e “armëve” të ndaluara nga persona civilë, atëherë pozita ligjore e përdoruesve të tyre dhe organizatorëve apo “stërvitësve” do të vështirësohet ndjeshëm.
Lexo edhe:
Policia “toleron” Gaz Bardhin. Nuk a arrestoi në flagrancë, megjithëse rrezikon 7 vjet burg
