Nga Boldnews.al
Policia e Shtetit ka njoftuar zyrtarisht se e ka vendosur në procedim penal deputetin e Partisë Demokratike, Gazmend Bardhi, si i dyshuar për veprat penale “Shkelja e rregullave mbi lëndët plasëse…” dhe “Stërvitja për përdorimin e paligjshëm të lëndëve të rrezikshme…”, pas incidenteve të zhvilluar në selinë e partisë opozitare të Shtunën e javës që sapo përfundoi.
Për këto shkelje, Kodi Penal parashikon vetëm dënim me burgim.
Konkretisht, për veprën e parë, “Shkelja e rregullave mbi lëndët plasëse”, ligji parashikon dënim nga një deri në 5 vjet.
Ndërsa për veprën e dytë, “Stërvitja për përdorimin e paligjshëm të lëndëve të rrezikshme”, Kodi Penal parashikon një dënim më të rëndë, nga 2 deri në 7 vjet burgim.
Kodi i Procedurës Penale, në nenin 251 të tij, parashikon detyrimin e Policisë Gjyqësore për kryerjen e arrestimit të personave që kryejnë vepra penale me dashje dhe që kanë një maksimum dënimi me burgim nga 5 vjet e lart.
“Oficerët dhe agjentët e policisë gjyqësore kryejnë detyrimisht arrestimin e cilitdo që kapet nëflagrancë për një krim me dashje, të kryer ose të mbetur në tentativë, për të cilin ligji cakton dënimin me burgim jo më të ulët në maksimum se pesë vjet”.
Në rastin e deputetëve, Kushtetuta parashikon një mbrojtje të posaçme për deputetët nga arrestimi (imunitetin), ku kërkohet autorizimi nga Parlamenti kur Prokuroria kompetente kërkon autorizim për arrestim.
Megjithatë, ka një përjashtim në rastin e flagrancës.
Neni 73 i Kushtetutës parashikon se: “Deputeti mund të ndalohet ose të arrestohet pa autorizim kur kapet në kryerje e sipër ose menjëherë pas kryerjes së një krimi të rëndë. Prokurori i Përgjithshëm ose Drejtuesi i Prokurorisë së Posaçme njofton menjëherë Kuvendin, i cili, kur konstaton se nuk ka vend për procedim, vendos për heqjen e masës”.
Në rastin konkret, veprimet e Policisë Gjyqësore janë kryer në kushtet e flagrancës, pasi hetuesit zhvilluan veprimet hetimore gjatë kryerjes së veprës penale dhe i vijuan edhe më pas, pa shkëputje.
Nga veprimet e kryera në situatën e flagrancës, oficerët e Policisë Gjyqësore kanë krijuar dyshimet se deputeti Gazmend Bardhi ka kryer veprat penale, për të cilat parashikohet një dënim me maksikum më të madh se 5 vjet burgim.
Kushtetuta, siç u citua më lart, lejon arrestimin e deputetit në flagrancë, pa marrë më parë autorizimin e Parlamentit.
Ndaj, e gjithë analiza ligjore të çon në përfundimin se Policia e ka toleruar deputetin Gazmend Bardhi, ndërkohë që ka pasur detyrimin për ta arrestuar në flagrancë, si person i dyshuar për kryerjen e veprave të rënda penale.
Më pas, sipas përcaktimeve kushtetuese, vijohej me kërkesën për autorizim nga Parlamenti të dorëzuar nga Prokuroria kompetente (SPAK), dhe ligjvënësit, brenda 48 orëve, duhet të shprehen me votë nëse miratojnë zgjatjen e burgosjes apo lirimin e menjëhershëm.
