Lulzim Basha, i shkarkuar nga posti i kreut të PD që me 11 dhjetor, ku mbi 4400 delegatë votuan pro largimit të tij, vendim që më pas u ratifikuar edhe nga anëtarësia në referendumin e 18 dhjetorit, vendosi sot në orën 03:00 të përjashtojë nga partia, ish-Kryeministrin Sali Berisha, si dhe disa mbështetës të tij, ndërkohë që për një pjesë tjetër vendosi pezullimin.
Ndërkohë disa orë pas këtij vendimi, i cili konsiderohet nul nga Komisioni i Rithemelimit, Basha ka thirrur në seli një mbledhje me deputetët që e mbështesin atë.
Takimi i Bashës me deputetët pritet të mbahet në selinë e PD-së, e cila vijon të jetë e blinduar. Takimi do të mbahet në mesditë dhe me shumë gjasa, Basha do të njohë deputetët me vendimin për përjashtimin nga PD të Sali Berishës dhe 7 anëtarëve të Komisionit të Rithemelimit nga Partia, dhe pezullimin e 19 të tjerëve.
