Për Igli Taren duket se po vjen koha për të mbyllur një kapitull të gjatë si drejtues te Lazio. Janë të sigurtë mediat italiane që shkruajnë se në klubin bardhekaltër ka probleme të mëdha ku trajneri Sarri dhe Igli Tare janë përplasur për shumë çështje, sidomos për merkaton.
Jo më kot trajneri italian në çdo dalje të fundit në javët e fundit ka përmendur se duhen përforcime me çdo kusht e nga ana tjetër Tare ende nuk po reagon ndaj fjalëve të tij.
Vedat Muriqi për shembull është rasti konkret ku të dy janë përplasur pasi Tare kërkon të mbrojë investimin e bërë për ta rikuperuar e ndoshta për ta shitur por trajneri nga ana e tij preferon të ndryshojë skemë dhe sulmuesin dardan nuk e aktivizon.
Trajneri dhe Dr. Sportiv shqiptar janë në drejtime krejtësisht të kundërta aq sa në fund të sezonit njëri do të largohet dhe me shumë mundësi do ta bëj ish sulmuesi kuqezi.
Largimi i Igli Tares mbështetet më shumë edhe nga mediat italiane për faktin se presidenti Lotito po mban anën e trajnerit duke lejuar kështu që në fund të këtij sezoni, Lazio të ndahet pas shumë vitesh, plot 13 të tillë me të.
