Analisti Andi Bushati ka reaguar pas vendimit të Lulzim Bashës për përjashtimin e përjetshëm nga PD të ish-Kryeministrit Sali Berisha dhe 7 anëtarëve të Komisionit të Rithemelimit, si dhe pezullimit të 19 të tjerëve, pjesë e këtij Komisioni.
Vendimi u mor nga Basha dhe mbështetës të tij, në një mbledhje që u cilësua si e Kryesisë, edhe pse Kuvendi i 11 dhjetorit, ka shkarkuar çdo drejtues të kësaj partie, përfshi edhe Lulzim Bashën dhe anëtarët e emëruar prej tij në Kryesi.
Bushati në reagimin e tij shprehet se është shumë e qartë se kush ka marrë urdhër për shkatërrimin e opozitës.
“Sapo u ngritën disa zëra të brishtë edhe nga radhët e të vetëve, që folën për zgjidhje përmes votës, Basha nisi përjashtimet për të shmangur çdo rrugë demokratike.
Karrigia e biznesit, më e rëndësishme se opozita e unifikuar,” shkruan Bushati.
Më herët, gazetari shkruante: “më çudisin disa, që i kam pasur në krah, kur për 8 vite me radhë i kërkonin Ramës zgjedhje të parakohshme, ndërsa tani i shoh që të thonë se vetëm karrigia e Bashës është e panegociueshme, qoftë edhe për zgjidhjen e krizës”.
