Protesta kundër Bashës, policia e Ramës blindon institucionet. Forca speciale edhe te Kuvendi

Një protestë e thirrur nga Komisioni i Rithemelimit të PD dhe ish-Kryeministri Sali Berisha, të cilët kërkojnë zbatimin e vendimeve të Kuvendit Kombëtar të 11 dhjetorit, që shkarkoi Lulzim Bashën si kryetar i PD, duket se ka alarmuar më shumë Kryeministrin Edi Rama se sa vetë Bashën.

Në orët e vona të mbrëmjes së djeshme, u shfaqën pamjet e blindimit të godinës së Kryeministrisë, edhe pse demokratët kanë deklaruar se nuk kanë asnjë punë në protestën e sotme me Qeverinë.

Berisha deklaroi se sot demokratët kanë punë me pengun e Edi Ramës në PD, duke etiketuar kështu Lulzim Bashën.

Por, përveç veshjes së dyerve dhe dritareve të godinës së Kryeministrisë me llamarina, mëngjesin e sotëm ka pasur një përqëndrim të forcave speciale të Policisë, madje vendosjen edhe të snajperistëve në tarracën e godinës qeveritare.

LEXO EDHE  Ndërron jetë në spital i riu që u dhunua barbarisht disa javë më parë

Gjithashtu, disa dhjetra forca speciale të FNSH, por edhe të RENEA, janë përqëndruar te godina e Parlamentit, vetëm pak metra larg selisë së PD. Nuk dihet nëse këto trupa do të qëndrojnë neutrale dhe kanë si detyrë të mbrojnë vetëm godinën e Parlamentit nga ndonjë sulm, apo janë përqëndruar aty për të ndërhyrë në protestën e thirrur nga Komisioni i Rithemelimit kundër Bashës.

Në thelb e gjithë kjo situatë krijon tensione, panik dhe mund të provokojë protestuesit, organizatorët e të cilëve, kanë deklaruar për një protestë tërësisht paqësore.

Ditën e djeshme, në deklaratën e tij për mediat, Lulzim Basha, foli për agresorë, të cilët do të merrnin përgjigjen e merituar, deklarata këto që sërisht mund të interpretohen si provokime.