Me thirrjet “Berisha, Berisha”, anëtarët e PD së Fierit kanë pritur ish-Kryeministrin, në takimin e organizuar me rastin e 31 vjetorit të krijimit të degës së kësaj partie në këtë qytet.
Duke marrë fjalën në këtë aktivitet, Berisha tha se Partia Demokratike përmbysi rendin më tragjik që ka njohur historia e njerëzimit, diktaturën komuniste.
Berisha tha se sot kemi shumë detyrime për tu përulur me nderim të madh dhe për të shprehur mirënjohjen e thellë ndaj burrave dhe grave, intelektualëve, që themeluan PD dhe degët e saj në të gjithë vendin.
“Ishte një kohë kur diktatura e llogariste Fierin si një bastion të saj. Terrori i kuq na shoqëronte nga një komunë në një komunë tjetër, nga një fshat në një fshat tjetër, por ashtu siç ishin edhe idealet e demokratëve, ne qëndronim në të drejtën tonë, duke realiyuar qëllimet tona në mënyrë paqësore”, tha Berisha, duke shtuar se arma e vetme që kishim ne në atë kohë ishte toleranca.
Berisha tha se dega e PD në Fier ishte dhe mbetet një nga degët më kryesoret për Partinë Demokratike dhe fatet e saj.
“Në rast se qendra e PD do të kishte funksionuar siç keni funksionuar ju, do kishte dëshmuar guximin dhe standardet tuaja morale, Partia Demokratike do të ishte prej kohësh në pushtet”, tha Berisha, duke iu drejtuar të pranishmëve.
Ish-Kryeministri tha se PD vjen në këtë 31 vjetor, me një udhëheqje të PD-së që ka dëshmuar paaftësi dhe shumë probleme të tjera.
“Lulzim Basha e çoi PD nga humbja në humbje, dështoi në çdo nismë që ndërmorri, nuk u bë kurrë lider i besueshëm, për demokratët dhe shqiptarët”, tha Berisha, duke shtuar se “fara e keqe e tillë mbetet”.
Ai tha se Basha nuk ka parime dhe dëshmoi standardet më të ulëta politike, që askush më parë nuk i kishte dëshmuar në 30 vjet pluralizëm.
