Lulzim Basha i mbyll dyert e selisë së PD edhe të rinjve të Forumit Rinor të kësaj partie, të cilët kanë qenë protagonistë jo vetëm në protestat që Basha ka thërritur në Tiranë, por edhe në fushatën për zgjedhjet e 25 prillit.
FRPD, si një organizatë partnere e PD, ka mbështetur pothuajse çdo nismë të Lulzim Bashës, deri në momentin kur të rinjtë e forumit iu bashkuar “Foltores” duke mbështetur ish-Kryeministrin Sali Berisha.
Në një deklaratë për mediat, të rinjtë e FRPD e kanë cilësuar të turpshme situatën e krijuar në PD.
“Ne kemi hyrjen tonë për të hyrë në zyrat e Forumit. Kjo është njv mbyllje dyersh ndaj atyre që kanë mendime të ndryshme nga ata që janë ngujuar në selinë e PD”, u shprehën të rinjtë.
Sipas tyre, Basha ka frikë nga të rinjtë, ndaj mbyll dyert dhe ndërron bravat.
“Ne nuk duam një PD me dyer e brava të mbyllura, PD është shumë më e madhe se kryetari apo deputeti Basha.Me datën 8 janar ne do të jemi në protestë për të çliruar PD nga bunkerizimi, për ti kthyer dinjitetin familjes sonë politike”, u shprehën të rinjtë.
Sipas tyre, Basha po i mbyll derën të ardhmes duke mos lejuar të rinjtë të hyjnë në zyrat e Forumit.
“PD nuk është selia e një personi, qoftë ky edhe Lulzim Basha”, thanë të rinjtë.
