Fehmi Kupina zgjidhet Kryetar i Asamblesë së Prishtinës, ja mesazhi i parë që jep

Fehmi Kupina nga Lidhja Demokratike e Kosovës (LDK) ka arritur të zgjidhet kryesues i Asamblesë në Prishtinë, në rundin e tretë të votimit.

Kupina u zgjodh në rundin e tretë, pasi në dy rundet e para nuk mjaftonin 25 vota. Ndërsa, në rundin e tretë ku të pranishëm ishin 42 asamblistë mjaftonin votat e shumicës së thjesht.

Kryesuesi Kupina u zgjodh me mbështetjen e PDK-së, që thuhet se është arritur një koalicion mes këtyre dy subjekteve politike për bashkë qeverisje.

Ndonëse, VV ishte prezentë gjatë votimit, AAK dhe AKR nuk ishin në sallë për votimin e kryesuesit të LDK-së.

Kryesuesi i ri Kupina, theksoi para të pranishmëve se në mandatin e tij do të vazhdon përkushtimin e tij për të përmbushur nevojat e qytetarëve.

“Ky mandat do jetë vazhdim i përkushtimit, punës, vullnetit, angazhimit të pandalshëm për të përmbushur kërkesat dhe nevojat e qytetarëve. Së pari dua të uroj anëtarët e sapo zgjedhur të kuvendit komunal të Prishtinës, duke iu dëshiruar sukses dhe punë të mbarë. Është nder i madh të jem sot para jush, besimi juaj është nder dhe përgjegjësi për mua[…]Do të punojë shumë që kuvendi të jetë sa më transparent dhe llogaridhënës karshi qytetarëve tanë. Plani jonë tash është i qartë, qytetari i Prishtinës do të jetë kryefjala e çdo zhvillimi”, theksoi Kupina.

LEXO EDHE  Policia blindon zonën e ‘5 Majit’, pritet shembja e banesave

Në fillim të mbledhjes, nga Vetëvendosje si subjekti më i madh në Asamble është refuzuar dhënia e propozimit. Ani se nuk morën pjesë në votim, asamblistët e VV-së qëndruan në sallë gjatë votimit të kandidatit të LDK-së për kryesues. Gëzim Sveçla asamblist nga VV-ja, theksoi se ky subjekt nuk është penguese e proceseve.

Sveçla: Mbetet në duart tuaja, ashtu siç jeni bërë bashkë më 14 nëntor

“LVV si subjekti më i madh politik në kryeqytet dhe me numrin më të madh të asamblistëve ka të drejtën që e para të propozojë kryesuesin, mirëpo ne heqim dorë nga kjo e drejtë, dhe ia kalojmë subjekteve tjera. Mbetet në duart tuaja, që ashtu siç jeni bërë bashkë më 14 nëntor, të bëheni bashkë sot, ta zgjedhim kryesuesin dhe të procedojmë me pika të tjera të rendit të ditës. LVV nuk është penguese e proceseve dhe ne do të qëndrojmë në sallë”, tha Sveçla.