Një person humbi jetën dhe 4 të tjerë mbetën të plagosur si pasojë e një atentati të ndodhur pasditen e djeshme në zonën e Don Boskos në Tiranë.
Ndaj viktimës dhe të plagosurve, që ndodheshin në një lokal, u qëllua me breshëri automatike nga një makinë, e cila ishte me targa false.
Ngjarja ndodhi rreth orës 16:30 të së martës, ndërsa policia ende nuk ka rënë në gjurmët e autorëve.
Të plagosurit ndodhen në spitalin e Traumës, ndërsa dy prej tyre kanë qenë në gjendje për të folur para grupit hetimor lidhur me atë se çfarë ndodhi, edhe pse dëshmia e tyre e parë duket se nuk ka ndihmuar hetimet.
Kjo për faktin se Arben Dani dhe 19 vjeçarit Azbi Selimaj, raportohet të jenë shprehur se nuk kanë mundur të shohin asgjë vetëm kur janë hasur me breshërinë e plumbave.
Arben Dani është mik i viktimës dhe personave të tjerë që ndodheshin në tavolinë me të dhe kishte ardhur nga Durrësi për t’i takuar.
Viktimë e atentatit të djeshëm mbeti Erion Çela, ndërsa të plagosurit janë Arben Dani 46 vjeç, Blerim Çela 28 vjeç, vëllai i viktimës, Edmond Cëroi, 41 vjeç daja i viktimës dhe Azbi Selimaj, 19 vjeç, për të cilin u tha fillimisht se ishte kamarier i lokalit, por ai ishte një klient, i ulur në tavolinën ngjitur dhe nuk kishte asnjë lidhje me personat e tjerë të plagosur apo viktimën.
Viktima kishte mbajtur edhe emrin Adriatik Çela, ndërsa ishte pronar i një tabakino, që ndodhet shumë pranë vendit ku u vra. Nga raportimet mësohet se 35-vjeçari priste të bëhej baba i nja vajze. Në vendin e ngjarjes policia nuk ka gjetur asnjë gëzhojë pasi të gjitha kanë mbetur në makinën e autorëve.
Policia dhe grupi hetimor ende nuk kanë mundur të përcaktojnë se kush ishte objektiv i atentatit, edhe pse ka dyshime se mund të ketë qenë i plagosori Cëroi, daja i viktimës.
