Tre viktima, mes tyre një grua shtatzënë, shkaktoi rrëshqitja e gurëve në Torovicë të Lezhës në vitin 2017.
Por pavarësisht tragjedisë së rëndë, prej asaj kohe bashkia e Lezhës dhe autoritetet e tjera nuk kanë marrë asnjë masë, duke lënë banorët në rrezik për jetën.
Kryebashkiaku i Lezhës, Pjerin Ndreu, ngre duart lart teksa gishtin e përgjegjësisë e drejton tek Qeveria shqiptare dhe Autoriteti Rrugor.
“Nuk ka plan bashkia fare se nuk merret. Bashkia e ka ngritur zërin për atë problem dhe qeveria duhet të gjejë zgjidhje bashkë me ARRSH”, tha ai për mediat.
Teksa Bashkia ka vendosur të rrijë duarkryq, Ndreu thotë se te Qeveria dhe ARRSH është prezantuar plani por nuk është bërë asgjë më shumë.
“Është prezantuar plani. Është një problem që ekziston, ashtu siç u ndërhy në Shëngjin duhet të ndërhyhet dhe atje.”
Derisa Bashkia Lezhë dhe Qeveria të vendosin se kush do të ndërhyjë, banorët e Torovicës dhe udhëtarët do të vazhdojnë të jetojnë e kalojnë aty me sytë nga mali.
