Apeli i GJKKO ka rrëzuar sot kërkesën e bërë nga ish ministri i Mjedisit, Lefter Koka, i cili kërkoi ndryshimin e masës së sigurisë së arrestit me burg me pretendimin se nuk ishte person me rrezikshmëri të lartë.
Në vendimin e dhënë, Gjykata shprehet se ish ministri Koka, i cili akuzohet për veprën penale të korrupsionit, të pastrimit të parave dhe shfrytëzimit të postit publik, do qëndrojë në burg të paktën deri në përfundimin e plotë të hetimeve që janë ndërmarrë ndaj tij.
SPAK ka deklaruar se afera e inceneratorëve është ende nën hetim, përfshi këtu edhe inceneratorët e Fierit dhe Tiranës, pas atij të Elbasanit.
Në SPAK janë depozituar kallëzime penale lidhur me aferën e inceneratorëve qoftë nga PD ashtu edhe nga LSI. Koka është i vetmi prej zyrtarëve që sot ndodhet në masën e sigurisë së arrestit me burg lidhur me këtë aferë,ndërsa janë shpallur në kërkim Stela Gugallja dhe Klodian Zoto lidhur me inceneratorin e Elbasanit, si dhe Klodian Mërtiri, për të cilin ka pasur akuza publike se qëndron pas aferës, që konsiderohet si më e madhja e 30 viteve të fundit.
Nuk dihet nëse SPAK do ti shkojë deri në fund hetimeve lidhur me inceneratorët, ndërsa opozita ka ngritur në Kuvend edhe një Komision Hetimor, puna e të cilit është bllokuar, për shkak të qëndrimeve të mazhorancës së Kryeministrit Edi Rama.
Hetimet e SPAK
Ish-ministri i Mjedisit Lefter Koka, është arrestuar nga SPAK për çështjen e inceneratorit të Elbasanit, pasi akuzhohet për korrupsion dhe shpërdorim detyre. SPAK ka thënë se Ministria e Mjedisit nën drejtimin e Kokës nuk ka kryer veprimet e plota përgatitore për dhënien e koncensionit.
Sipas SPAK është konstatuar se është aplikuar procedura me negocim pa shpallje paraprake, kur këtë gjë e përjashton ligji.
Në kërkim për këtë dosje mbeten dy biznesmenët Stela Gugallja dhe Klodian Zoto që akuzohen se kanë lëshuar fatura fiktive me vlerë 3.6 milionë Euro për punime që nuk janë kryer asnjëherë në inceneratorin e Elbasanit.
SPAK ka vendosur nën sekuestro inceneratorin e Elbasanit, kompaninë që e ka ndërtuar si dhe 88 përqind të aksioneve të kantinës së pijeve alkoolike “Gjergj Kastrioti Skënderbeu”, që ishin në pronësi të Lefter Kokës.
