Me përfundimin e festimeve në natën e ndërrimit të viteve, duket se edhe Covid-19 ka mbaruar “pushimet”, ndërsa Policia e Shtetit, riktheu orën policore.
“Policia e Shtetit sqaron të gjithë qytetarët që ora policore është në fuqi pas datës 01 janar dhe apelon për të gjithë administratorët e lokaleve që të respektojnë masat anticovid dhe orarin e përcaktuar për ushtrimin e aktivitetit”, thuhet në një njoftim zyrtar të Policisë.
Ora policore u hoq në natën e ndërrimit të viteve, ndërsa është rivendosur sërisht, çka i bën edhe më qesharake masat që aplikon Komiteti Teknik i ekspertëve anti-Covid, që prej muajsh e muajsh, kufizojnë lëvizjet në orët e natës me argumentin se kjo ndikon në përhapjen e virusit.
Nuk dihet se mbi çfarë argumenti në natën e ndërrimit të viteve u lejuan qytetarët të mblidhen në sheshe apo lokale për të festuar Vitin e Ri, ndërsa në netët e tjera të vitit, ato janë të rrezikuar nga virusi.
Gjithashtu, Policia në njoftimin e saj bën të ditur se në të gjithë vendin, në akset rrugore interurbane, urbane, por dhe në akset rurale, shërbimet e saj vijojnë kontrollet e shtuara, duke përdorur makinën inteligjente, dronë, radarë, alkooltestues, kamera e mjete të paloguara, me qëllim parandalimin e aksidenteve rrugore.
“Nisur nga fluksi i lartë automjeteve, shumica e të cilave gjatë ditës së sotme kanë lëvizur në drejtim të zonave bregdetare dhe turistike, Policia Rrugore në të gjithë akset nacionale ka rritur më shumë prezencën dhe mjetet logjistike që ka në dispozicion, për të monitoruar qarkullimin rrugor.
Në këtë kuadër, Policia apelon edhe një herë për të gjithë drejtuesit e automjeteve që të zbatojnë me përpikëri rregullat e qarkullimit rrugor, të ruajnë distancën, të mos shpejtojnë duke kryer parakalime të gabuara apo të qarkullojnë me shpejtësi tej normave të lejuara, si dhe të mos drejtojnë mjetin nën efektin e alkoolit apo në gjendje të dehur, të mos përdorin celularin gjatë drejtimit të automjetit, të vendosin rripin e sigurimit, pasi të gjitha akset rrugore janë të monitoruara nga patrullat e Policisë Rrugore që janë në lëvizje me mjete të paloguara, janë të monitoruara me radarë, dronë, kamera dhe aparate forografike”, thotë policia.
