Nga Boldnews.al
Një nga akset rrugore më të përdorura në Shqipëri është rruga Durrës-Rrogozhinë dhe anasjelltas. Ky aks përdoret për të shkuar dhe ardhur nga Jugu i vendit drej Tiranës e Durrësit apo drejt Veriut, Kosovës dhe Malit të Zi.
Por, një rrugë e përdorur edhe nga qytetet juglindore apo nga Maqedonia e Veriut për të shkuar në Portin e Durrësit. Prej disa vitesh ky aks është futur në tenderim nga Autoriteti Rrugor Shqiptar për ta mirëmbajtur, madje janë paguar miliona euro për riparime asfalti dhe barrierave mbrojtëse.
Por, në periudha të caktuara ky aks lihet në mëshirë të fatit. Asfalti shkatërrohet dhe rruga mbushet me gropa të mëdha. Në redaksinë e Boldnews.al mbërritën dhjetëra ankesa për gjendjen e rrugës. Përdoruesit ankohen se kanë pësuar çarje gomash dhe janë aksidentuar në këtë segment si pasojë e gropave në rrugë.
Video: Rruga nga Durrësi në Rrogozhinë, dhe anasjelltas, është e mbushur me gropa
Një vit më parë, Autoriteti Rrugor Shqiptar doli dhe i riparoi vetë gropat në rrugë. Ndërkohë, kur kaluan disa muaj nga ai riparim, rruga është shkatërruar. Sipas vëzhgimit që ka bërë Boldnews.al, asfalti është shkatërruar, duke krijuar gropa të mëdha.
Pjesë të asfaltit janë hequr, ndërsa i gjithë aksi është burim aksidentesh. Përdoruesit ankohen se kjo gjendje përsëritet dhe se firmat kontraktore bëjnë punime shumë të këqija. Sipas ankesave, asfalti është riparuar në mënyrë skandaloze, tëksa aktualisht është bërë andra andra.
Sipas dokumenteve që disponon Boldnews.al, në fillim te vitit 2018, Autoriteti Rrugor Shqiptar bëri disa tendera për mirëmbajtjen e rrugëve kryesore në Shqipëri. Janë shpenzuar dhjetëra miliona euro për mirëmbajtjen. Segmenti nga Durrësi në Rrogozhinë duhet të mirëmbahet nga kompanitë BIOLIAP dhe GECI LTD.
Kjo rrugë është në pjesën B të mirëmbajtjes. Sipas dokumenteve që disponon Boldnews.al, këto kompani duhet të mirëmbajnë 286 kilometra. Vlera e tenderit është 19.698.052 euro. Në dokument thuhet se mirëmbajtja ka filluar në datën 11 shkurt 2018 dhe përfundon në 31 dhjetor 2022.
Por, duket se kompanitë kanë menduar se afati ka qenë fundi i vitit 2021, duke e braktisur këtë aks që përdoret nga qindra mijëra automjete çdo ditë. Por, nëse aksidentet ndodhin për shkak të gjendjes, kush është fajtor?!
Autoriteti Rrugor Shqiptar që është “pronarja” e rrugës apo firmat BIOLIAP & GECI që e mirëmbajnë? Por, fakt është se shteti shqiptar i paguan këtyre firmave 20 milionë euro për ta lënë në këtë gjendje. Dhe, këto para janë të të gjithë shqiptarëve, të cilat po shkojnë në xhepat e disa oligarkëve.
