Detaje të reja janë zbardhur nga vdekja tragjike e 27 vjeçarit në Cërrik, ngjarje e ndodhur një ditë më parë, pasi i shpërtheu në dorë një sasi lënde plasëse.
Sipas raportimeve, mësohet se policia po heton në dy pista, atë të një atentati të dështuar, ose të riut i ka plasur në dorë eksplozivi që do e vendoste diku tjetër.
Një nga pistat e hetimit për vdekjen e 27-vjeçarit Erion Rexhepi, në Cërrik, është ajo se i riu e ka gjetur lëndën plasëse në rrugë, sapo ka dalë nga shtëpia, ndërsa pista tjetër është ajo e përdorimit të tij si i paguar për të kryer një atentat.
Ndër të tjera mësohet se mina me telekomandë ka pasur të paketuar një sasi prej 250 gram lënde shpërthyese C 4, e cila dyshohet se do të përdorej për një atentat të dështuar.
Kujtojmë se ngjarja e rëndë ka ndodhur mesditën e së enjtes në aksin rrugor Elbasan-Belsh, në vendin e quajtur ‘Kryqëzimi i lagjes nr. 3’, Cërrik, ku shtetasit Erion Rexhepi., 27 vjeç, i ka shpërthyer një sasi lëndë plasëse në dorë dhe për pasojë ka humbur jetën.
