Ambasadorja amerikane Yuri Kim përmes një videomesazhi ka uruar të gjithë shqiptarët për festat e fundvitit, dhe ka bërë një bilanc të 2021.
Kim thotë se SHBA edhe këtë vit ka qenë krahë shqiptarëve, ndërsa fokusin më të madh në fjalimin e ambasadores e ka pasur Reforma në Drejtësi.
Diplomatja amerikane gjithashtu pranon se zgjedhjet e 25 prillit kishin parregullsi, të cilat u evidetuan në raportin e OSBE/ ODIHR, edhe pse Yuri Kim dhe zyrtarë të DASH ishin të parët, që pa përfunduar numërimin i votave uruan Kryeministrin Edi Rama për mandatin e 3-të si Kryeministër.
Kim në mesazhin e saj ka renditur vështirësitë me të cilat janë përballur shqiptarët, pak a shumë ato çka edhe Kryeministri Edi Rama i paraqet në pothuajse çdo dalje publike.
“Është e vështirë të besosh se vitit 2021 tashmë po i vjen fundi. Ishte padyshim një vit sfidash të jashtëzakonshme, ndërsa bota vazhdoi të përballej me pandeminë e COVID-19 dhe teksa Shqipëria vijoi rimëkëmbjen pas tërmetit të 2019-ës dhe u përball me përmbytjet dhe zjarreti e këtij viti.
Pavarësisht këtyre dhe sfidave të tjera, Shtetet e Bashkuara dhe Shqipëria, jo vetëm festuan 30 vjetorin e rivendosjes së marrëdhënieve diplomatike, por dhe bëmë përparim historik drejt forcimit të demokracisë.
Me krenari ju mbështetëm teksa ecët përpara në zbatimin e reformës në drejtësi, Gjykata Kushtetuese, pas tre vitesh përgjumjeje, filloi të funksionojë në fillim të këtij viti, duke iu bashkuar elementëve të tjerë të drejtësisë shqiptare, përfshirë SPAK dhe BKH. Falë përkushtimit të tyre, kemi filluar të shohim rezultate reale dhe pozitive në luftën kundër korrupsionit, krimit të organizuar dhe pandëshkueshmërisë.
Reforma në drejtësi nuk ka qenë e shpejtë apo e përsosur, por ajo ecën përpara duke sjellë më afër venditur që ju takon pranë Bashkimit Europian dhe SHBA-së. Qytetarët gjatë këtij viti ushtruan të drejtën demokratike për të votuar.
Pas zgjedhjeve, OSBE-ODIHR hartoi një raport ku vuri në dukje mangësi dhe parregullsi, dhe ne mirëpresim që tju mbështesim në përpjekjet për tu përgjigjur rekomandimeve të ODIHR. Në emër të Ambasadës së SHBA, ju falenderojmë për vitin e mrekullueshëm që lamë pas së bashku dhe ju dërgojmë urimet më të mira për vitin që po vjen! Gëzuar Vitin e Ri”, shprehet ambasadorja Kim.
