Prokurorët e SPAK-ut, ose “heronjtë e fëmijëve të sotëm” sipas ambasadores Yuri Kim, do të luftojnë fort krimin dhe korrupsionin edhe gjatë vitit të ardhshëm.
Zotimin e bëri drejtuesi i Prokurorisë së Posaçme, Arben Kraja, gjatë një deklarate për gazetarët këtë të Mërkurë, në përfundim të një aktiviteti.
Kraja vlerësoi punën e mirë sipas tij të institucionit që drejton gjatë vitit të kaluar, duke deklaruar se u punua me “intensitet të lartë”. Ai deklaroi se i njëjti ritëm do të ndiqet edhe vitin e ardhshëm.
Ndërsa në vijimësi të hiperbolës së përdorur nga Kim, se “SPAK është kthyer në tmerrin e kriminelëve”, shtoi se 2022 do të jetë një vit i vështirë për shkelësit e ligjit.
Premtim në fakt të kujton ato të ish-kryeprokurorit Adriatik Llalla, i cili zotohej se do të kishte arrestime të bujshme çdo vjeshtë, megjithatë përfundoi vetë me masë arresti.
I pyetur nga gazetarët lidhur me publikimin e të dhënave, Kraja u mënjanua duke deklaruar se është dosje për të cilën po heton prokuroria e Tiranës. Mesa duket SPAK është përqendruar në aksionet e fuqishme si ai i Dibrës ku u arrestua një inspektor i pyjores që aspironte të behej mësues.
Ky i fundit, i cili guxoi të jepte dhe ryshfet për postin, e pësoi nga SPAK-u, që tregoi dhëmbët duke i vënë prangat…
