Dy persona janë arrestuar lidhur me vrasjen me armë zjarri të 32-vjeçarit Albi Bashaliu, mëngjesin e së Hënës. Ata akuzohen si përkrahës të autorëve të krimit.
Veiz Bashali, 41 vjeç dhe Mikel Xhaja, 30 vjeç, të dy banues në fshatin Gjoçaj-Peqin, u vunë në pranga.
“Nga tërësia e veprimeve hetimore të kryera është dokumentuar se këta shtetas kanë kryer veprime aktive për të fshehur rrethanat e ngjarjes dhe kanë penguar aktivisht organet e Policisë, për t’u informuar për ngjarjen, rrethanat si ka ndodhur dhe motivin”, njoftoi policia.
Makina
“Gjithashtu, në kuadër të kryerjes së veprimeve procedurale dhe thellimit të hetimeve për këtë ngjarje të rëndë kriminale, në ndjekje e sipër të autorëve të dyshuar të veprës penale, më datë 28.12.2021, rreth orës 01:00, në aksin rrugor Gosë-Vibashtovë, Rrogozhinë, është gjetur automjeti tip ‘Volkswagen Caddy’, që ka qenë në përdorim nga viktima, Albi Bashaliu. Nga rrethanat e hetimit dyshohet se autorët kanë marrë mjetin e viktimës për t’u larguar, ndërsa mjetin me të cilin ata udhëtonin e kanë djegur në vendngjarje”, shtuan të njëjtat burime.
Në vendngjarje janë gjetur sende të ndryshme, të cilat u sekuestruan në cilësinë e provave materiale dhe që u dërguan për ekzaminime të mëtejshme në Institutin e Policisë Shkencore.
“Nga strukturat hetimore të Drejtorisë Vendore Elbasan, nën drejtimin e Prokurorisë së Rrethit Gjyqësor Elbasan, po punohet për identifikimin dhe kapjen e autorëve, ndërsa materialet u referuan në Prokurori, për veprime të mëtejshme”, njoftoi më tej policia.
Lexo edhe:
Ngjarja në Peqin/ Si u nxor në pritë viktima dhe kush është i riu që dyshohet se kreu vrasjen
