Një person është arrestuar dhe një tjetër është shpallur në kërkim nga policia e Tiranës, që ka sekuestruar rreth 2 kg kanabis.
Operacioni “Baldushku” erdhi pas hetimore disa javore.
“Në kuadër të operacionit u bë arrestimi në flagrancë i shtetasit N.S., 25 vjeç, banues në Baldushk, për veprën penale ‘Prodhimi dhe shitja e narkotikëve’ kryer në bashkëpunim, si dhe u bë shpallja në kërkim e bashkëpunëtorit të tij, shtetasit I.Sh., 39 vjeç, për veprat penale ‘Prodhimi dhe shitja e narkotikëve’ kryer në bashkëpunim dhe ‘Mbajtja pa leje e armëve të ftohta’. Këta shtetas, në bashkëpunim me njëri-tjetrin, pasi kultivonin bimë narkotike në zona malore në fshatin Baldushk, e përpunonin dhe e shisnin lëndën narkotike te blerës të ndryshëm, kundrejt pagesës 700 euro një kilogram”, njoftoi policia.
“Në zonën e Baldushkut, shërbimet e Policisë, kanë lokalizuar dhe më pas arrestuar në flagrancë shtetasin N.S., 25 vjeç, të cilit gjatë kontrollit të automjetit iu gjet dhe sekuestrua në cilësinë e provës materiale 2 kg e 200 gramë lëndë e dyshuar narkotike kanabis sativa. Në vijim të kontrollit, në banesën e shtetasit I.Sh., shërbimet e Policisë kanë gjetur dhe sekuestruar një dorezë metalike (përforcues grushti), doreza plastike dhe maska”, shtuan të njëjtat burime.
“Vijon puna për identifikimin dhe kapjen e personave të tjerë të përfshirë në këtë veprimtari kriminale, ndërsa materialet i kaluan Prokurorisë së Shkallës së Parë të Rrethit Gjyqësor Tiranë, për veprime të mëtejshme procedurale”, mbyllet njoftimi i policisë.
