Armando Broja duket se po kthen fatin e Ralf Hasenhutl te Sauthempton. Huazimi i sulmuesit shqiptar ka qenë ndoshta gjëja më e mirë që mund t’i ndodhte trajnerit austriak në këtë sezon, pasi djaloshi po tregon se është një futbollist i cili mund të ndryshojë fatin e ndeshjes, e pse jo edhe sezonit, ku Southempton dukej i destinuar për të rënë nga kategoria.
Edhe ndaj Uest Hem ai nuk shënoi, por fitoi një penallti që ktheu sfidën përsëri në favorin e skuadrës së tij dhe trajneri Hasenhutl pranoi se ishte një moment që ndryshoi rrjedhën e takimit.
“Ishte moment kyç. Mendoj se është një faull i qartë. Nëse ishte brenda apo jashtë zonës, nuk mund ta shoh nga pikëpamja ime. Por ishte një faull i qartë, pasi ai kishte ikur, ai mund të shënonte apo jepte asist. Ai është i shpejtë, Broja është super i shpejtë. Ata kishin probleme me të në pjesën e parë dhe kjo është arsyeja pse mendoj se ishte diçka e mirë që gjyqtari shikoi edhe një herë pamjet me VAR”, komentoi ai momentin kur Broja u rrëzua në zonë nga Douson.
Trajneri në fillim të sezonit hodhi dyshime rreth përkushtimit të Brojës dhe deklaroi se priste përgjigje prej tij, por tani këto dyshime janë zhdukur, aq sa i pyetur sot se sa i rëndësishëm është lojtari, ai u përgjigj menjëherë.
“Shumë i rëndësishëm, po, absolutisht. Ai bëhet gjithnjë e më i mirë. I pëlqen këtu me ne, i pëlqen të luajë me ne, ndjehet rehat këtu dhe ka dëshirën që të mësojë të punojë shumë, kjo është ajo që bëjmë ne”, theksoi trajneri për sulmuesin e talentuar shqiptar pas suksesit 3-2 të skuadrës së tij.
