Dy persona janë arrestuar nga policia e Korçës në kuadër të aksionit të koduar “Holiday”, që ka çuar në sekuestrimin e 1 kg kanabis.
Një nga personat e vënë në pranga ishte drejtuesi i një automjeti ku u gjet droga. Ndërsa tjetri, sipas hetimeve paraprake, kontrollonte rrugën.
Të arrestuarit janë: M. Ll., 29 vjeç, banues në Korçë dhe K. D., 33 vjeç, banues në fshatin Barç, Korçë.
Aksioni
“Forcat e Policisë, pas informacioneve të siguruara në rrugë policore, se në aksin rrugor Pogradec-Korçë, një shtetas do të transportonte lëndë narkotike, organizuan shërbimet dhe bënë të mundur lokalizimin dhe kapjen e shtetasit M.Ll., me automjetin tip ‘Fiat’, në afërsi të fshatit Bulgarec, gjatë kontrollit të të cilit, në pjesën e brendshme të kofanos, u gjet 1 kg lëndë të dyshuar narkotike kanabis, e cila u sekuestrua në cilësinë e provës materiale.
Nga veprimet e mëtejshme hetimore rezulton se, bashkëpunëtor i dyshuar në këtë veprimtari kriminale ishte edhe shtetasi K.D., i cili kryente kontrollin e rrugës me mjetin tip ‘Smart’. Gjatë kontrollit të banesës së këtij shtetasi, shërbimet e policisë gjetën një sasi të vogël lënde të dyshuar narkotike kanabis dhe një grirëse metalike për lëndë narkotike”, njoftoi policia.
Të njëjtat burime shtuan se po vijon puna për dokumentimin e plotë ligjor të kësaj ngjarjeje dhe vënien para përgjegjësisë penale të personave të tjerë të implikuar në këtë veprimtari, ndërsa materialet i kaluan Prokurorisë pranë Gjykatës së Shkallës së Parë Korçë për veprën penale “Prodhimi dhe shitja e narkotikëve”, kryer në bashkëpunim.
