Një lokal i përshtatur si laborator kultivimi kanabisi, në katin e parë të një banese dhe një sasi lënde narkotike është zbuluar nga policia në Kurbin.
Blutë bënë me dije se sekuestruan 58 kilogramë kanabis.
Në pranga u vunë 7 persona, 4 prej tyre me detyrë elektricistë dhe faturistë pranë OSHEE Kurbin.
Aksioni
Operacioni i koduar “Bushneshi” nga shërbimet e Komisariatit të Policisë Kurbin, në bashkëpunim me ato të Drejtorisë Vendore të Policisë Lezhë dhe të Komisariatit të Policisë Krujë, erdhi “pas informacioneve të siguruara në rrugë policore”, sqaruan burime zyrtare.
Gjatë operacionit, u bë arrestimi i:
- Lek Allamani, 54 vjeç, banues në Bushnesh-Kurbin
- Taulant Baroka, 27 vjeç, banues në Arrameras-Fushë Krujë
- Gimi Hida, 43 vjeç, banues në Tetovë
Ata akuzohen për veprat penale “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike”, kryer në bashkëpunim. Sipas bluve, në fshatin Bushnesh-Kurbin, kishin përshtatur katin e parë të një banese ku kishin bërë lidhje të paligjshme të energjisë elektrike, me aparatura që shërbejnë për kultivimin e bimëve narkotike.
Gjithashtu janë arrestuar për veprën penale “Shpërdorimi i detyrës”:
- Xhemal Danieli, 58 vjeç, banues në Bushnesh, më detyrë elektricist,
- Xhevalin Kaca, 56 vjeç, banues në Mamurras, me detyrë elektricist
- Bib Gjergji , 33 vjeç, banues në Fushë Mamurras, me detyrë përgjegjës në OSHEE Kurbin
- Alfred Fufi, 53 vjeç, me detyrë faturist i OSHEE.
Ata pasi dyshohet se kanë lejuar lidhje të paligjshme të energjisë elektrike në transformatorin elektrik me pjesën e jashtme që furnizonte me energji ndërtesën e përshtatur për kultivimin e bimëve narkotike.
Gjatë kontrollit të ambientit u gjetën dhe u sekuestruan 506 bimë të dyshuara narkotike cannabis sativa të kultivuara në vazo dhe 58 kilogramë e dyshuar lëndë narkotike cannabis sativa.
Në këtë ndërtesë u konstatua një lidhje e paligjshme e energjisë elektrike, e cila shërbente për furnizimin me energji të pajisjeve si llamba, aspirator, filtra ajrimi etj, që ndihmonin në kultivimin e bimëve narkotike.
Gjithashtu, në cilësinë e provës materiale u sekuestruan të gjitha pajisjet që kanë shërbyer për kultivimin e bimëve narkotike, si: pajisje elektrike, llamba elektrike termale, lëndë ushqyese për bimët narkotike, etj.
