Pas publikimit të pagave, sot rrodhën informacionet edhe për targat e automjeteve të qytetarëve, duke thelluar edhe më tej skandalin.
Por, Drejtoria e Përgjithshme e Shërbimeve të Transportit Rrugor, duke u distancuar nga nxjerrja e të dhënave, thekson se ka nisur një hulumtim dhe kërkim suporti nga kompania që mirëmban sistemin informatik, e kontraktuar nga AKSHI.
Reagimi i DPSHTRR është i ngjashëm me atë të një dite më parë nga Kryeministri Edi Rama dhe drejtoresha e AKSHI-t, që e hodhën topin e përgjegjësisë te Tatimet. Në rastin e publikimit të targave përgjegjësia u hodh te operatorët që kanë akses në sistem.
Sipas DPSHTRR, të dhënat e targave aksesohen nga shumë institucione dhe i shërben edhe operatorëve ekonomik shtetëror e privat
“Ndërkohë që do të kryhet një analizë e plotë për të dalë me një qëndrim zyrtar të bazuar në fakte, bëjmë me dije se kjo bazë të dhënash aksesohet nga shumë institucione, me nivele të ndryshme aksesi, dhe i shërben edhe operatorëve ekonomik shtetëror e privat”, theksohet në reagimin e DPSHTRR.
Tashmë nuk dihet se çfarë database mund të rrjedhë në ditët në vijim me informacione për qytetarët, ndërsa në rrjetet sociale ka plasur humori dhe gallata. E përtej mënyrës se si po trajtohet situata, fakti është se shteti ka dështuar për të ruajtur të dhënat sensitive të mijëra e mijëra shqiptarëve.
