Më 23 dhjetor, Komisioni i Rithemelimit të PD i bëri të ditur Lulzim Bashës se ka kohë deri më 5 janar që të lirojë zyrën e kryetarit të kësaj partie, pasi u shkarkua nga Kuvendi Kombëtar i 11 dhjetorit dhe referendumi i anëtarësisë e ratifikoi vendimin me rreth 44 mijë vota.
Por, për deputetin Flamur Hoxha, për nje demokrat që ka ideale, fjala “ultimatum” nuk ekziston.
Në një bisedë në ABC, Hoxha, i cili u caktua nga Lulzim Basha si Sekretar Organizativ i PD, u shpreh se në këto 30 vite kjo është hera e parë që debati dhe mosdakordësia nuk bëhen në institucion.
“Ne kemi për detyrë për të qenë pranë demokratëve. Nuk e kemi bërë kur ishin foltoret. Në këto 30 vite është herë a parë që debati dhe mosdakordësia nuk bëhet në institucion”, tha Hoxha.
Për Hoxhën, nëse PD do të dilte në terren në të njëjtën kohë kur mbaheshin foltore nëpër qytetet e Shqipërisë, do të dukej si një matje forcash
“Më mirë që u bë kështu sepse do të kishim një luftë mes demokratëve, të mitë dhe të tutë. Do të bënim një kontrast në partinë tonë. Gjykoj që ne, në momentin e daljes njëkohësisht do dukej sikur do matim forcat. PD u përket atyre që duhet të jenë më shumë në PD. Një parti që duhet të bëjë një reformim brenda vetes, të zgjojë shqiptarët që t’ia afrohen”, shtoi ai.
Hoxha u shpreh se “lufta e brendshme” nuk do të ndikojë në rezultatet që mund të kenë të djathtët në zgjedhjet lokale.
Por çfarë do të ndodhë nëse PD do t’i humbë edhe këto zgjedhje? Hoxha thotë se nëse do të ishte ai kryetar fillimisht do të krijonte një klimë për zgjedhje të lira e të ndershme dhe më pas secili do të marrë përgjegjësinë.
“Nëse do të isha unë kryetar, në mënyrë të panegociueshme do të krijoja klimën për zgjedhje të lira e të ndershme. Gjithsecili prej nesh do të marrë përgjegjësinë e tij, para se të hyjmë në zgjedhje të përcaktojmë qëndrimin do të mbajmë pas zgjedhjeve”, tha ai.
Flamur Hoxha deklaroi po ashtu se kushdo që të jetë në krye të Partisë Demokratike, ai do të jetë demokrat njësoj si në vitet ’90.
