Deputetja Jorida tabaku u shpreh sot nga selia e PD se përgjegjësia për skandalet e njëpasnjëshme që nga patronazhistët, afera e inceneratorëve dhe së fundmi publikimi i pagave, ka një përgjegjës që është Edi Rama.
Tabaku duke sjellë në vëmendje Komisionin Hetimor për serverin e Tatimeve, tha se ju kujtohet se si Spartak Braho bashkë me këshilltarin e Kryeministrit Ermal Beqiri dhe vëllain e Sekretarit të Përgjithshëm të PS-së Panajot Gjiknuri, shkojnë në Drejtorinë e Përgjithshme të Tatimeve për të marrë bazën e të dhënave për të gjitha bizneset.
“PD kërkoi një Komision Hetimor i cili provoi se këto të dhëna përdoreshin në zyrën e Kryeministrit.
Atëherë ligji u ndryshua në vitin 2015 dhe përgjegjës për sigurinë e të gjithë të dhënave në Republikën e Shqipërisë është AKSH-i.
Sot e dimë se burimi i të dhënave që kanë dalë dhe janë bërë publike, ashtu si edhe me patronazhistët është AKSH-i.
Unë kam nxjerrë disa tendera të cilat janë për sigurinë e të dhënave.
Në periudhën 2014-2021 qeveria shqiptare ka shpenzuar 43.4 milionë euro, 881 transaksione, pagesa për AKSH-in për sigurinë e të dhënave. Dhe e dini se kush është përgjejgës për të ruajtur të dhënat?
Ilir Beqja, që iu hoq mandati, pikërisht për këtë arsye sepse ka marrë tendera ndërkohë që ishte deputet dhe ministër.
Armand Frangu, të cilin PD e ka denoncuar nga kjo sallë.
Ermal Beqiraj, këshilltari i kryeministrit.
Sot në qoftë se ka persona përgjegjës për sigurinë e të dhënave, ata janë Edi Rama, njerëzit e afërt të tij dhe sigurisht AKSH-i”, tha Tabaku.
