Tentativa e dështuar për të ekzekutuar me tritol C4, Indrit Sadedinin, ka çuar policinë e Vlorës, në zbulimin e provave të tjera, që mund të çojnë në ndihmesë për të zbardhur autorët e këtij krimi të rëndë.
Nga burime pranë prokurorisë Vlorë, mësohet se në orët e mbrëmjes së djeshme, 20 dhjetor, policia është sinjalizuar nga banorë të një fshati në Fier, për një makinë të djegur.
Gjatë këtyre dy ditëve, policia ka dashur të marrë në pyetje objektivin e këtij sulmi, por Sadedini, nuk ka qënë në gjëndje të flasë për policët për ngjarjen e ndodhur më 19 dhjetor 2021 në hyrje të garazhit të pallatit ku Sadedini jetonte në lagjen “10 korriku”.
Megjithëse mjekët kanë thënë se Sadedini nuk ka asnjë rrezik për jetën në spital.
Në momentin kur ka shkuar policia në vendgjarje, automjeti ishte tërësisht i djegur. Ndërsa nga kontrolli i imtësishëm, grupi i hetimit nuk ka gjendur asnjë armë apo send tjetër të paligjshëm.
Për shkak të errësirës të natës, oficerëve të policisë Vlorë dhe ata të Fierit, kanë shkuar sërisht ditën e sotme në vendgjarje, duke bërë kontrollin e imtësishëm të zonës.
Sipas burimeve të policisë, mjeti i djegur është i tipit “Mazda”, i njëjtë me atë që pasditen e së dielës, u shfaq në zonën e “Lungomares”.
Duke bërë që prej andej, të zbresi një person me kapuç dhe maskë kirurgjikale në fytyrë, i cili pasi ka vendosur sasinë e tritolit C4 në parmakun e hyrjes së garazhit të pallatit ku jeton, Indrit Sadedini, sërisht personi i paidentifikuar, ka hipur në makinë dhe është larguar me shpejtësi.
Ndërsa një person tjetër që besohet se ka qëndruar në kafenetë rreth vendngjarjes, ka kryer aktivizimin e sasisë së tritol nga një distancë e afërt, sapo aty ka kaluar objektivi, Sadedini.
Makina e djegur
Vetëm pas më shumë se 24 orë nga ngjarja e rëndë, policia e Vlorës në bashkëpunim me atë të Fierit, mundën të gjenin mjetin tip “Mazda”, që dyshohet se u përdor në këtë ngjarje. Automjeti ishte me targat e qytetit të Lushnjës, targa këto që dy muaj më parë ishin raportuar si të vjedhura në komisariatin e këtij qyteti.
Policia dhe prokuroria e Vlorës, janë duke punuar me qëllim identifikimin dhe arrestimin e atentatorëve të Indrit Sadedini, i cili është hera e dytë brenda 4 viteve, që i shpëton një sulmi me tritol C4.
Sadedini në Vlorë njihet si shok i afërt me Isuf Brahimaj i vrarë në gusht 2014. Ndërsa kohët e fundit mbante shoqëri me Roland Shytin e Lushnjës, ky i fundit i skeduar nga policia për disa ngjarje kriminale.
Madje një muaj para se Sadedini të goditej me tritol, policia e Vlorës i kishte sekuestruar atij një automjet tip “Benz-Mercedes” të blinduar.
Pas bllokimit të makinës nga policia, 34-vjeçari Sadedini bënte lëvizje të kontrolluara, ndërsa mësohet se kishte marë për përdorim tek shokët e tij, Lushnjarë, një makinë tjetër të blinduar.
/Ora News/
