Derbi mes Partizanit dhe Tiranës gjithmonë ndez kryeqytetin. Veç rezultatit, kjo ndeshje luhet për prestigjin e dy ekipeve. Sulejman Starova është një nga ata trajnerë që e ka përjetuar emocionin e kësaj sfide teksa disa sezone më parë ishte në krye të të kuqve. “Bobi” është bërë nostalgjik duke bërë një postim në rrjetet sociale.
Ai tregon festën me Xhevahir Sukajn, teksa ky i fundit i shënonte me kokë në minutën e fundit Tiranës në stadiumin “Selman Stërmasi”. Partizani fitonte 2-1 ndaj bardhebluve dhe ky moment është fiksuar nga Starova përmes një fotografie që e ka shpërndarë në prag të derbit të radhës. Asokohe, Partizani dominonte teksa Tirana kishte disa vite pa arritur një fitore ndaj të kuqve.
