Ish-ministri i Mjedisit Lefter Koka u arrestua më 14 dhjetor me urdhër të Prokurorisë së Posaçme Kundër Korrupsionit dhe Krimit të Organizuar, në kuadër të hetimeve për koncesionin kontrovers të incineratorit të Elbasanit.
Ekonomisti Arben Malaj, teksa ka folur për aferën e incineratorëve, në një intervistë për Ora News, me gazetaren Matilda Mcini, u shpreh se të gjitha veprimet janë kryer brenda një dite, dhe sipas tij këtë projekt nuk e ka mbështetur vetëm një ministër, por pas tij ka pasur një fuqi më të madhe.
Arben Malaj: Janë kryer veprime në një ditë të caktuar. Ka pasur një fuqi madhore dhe nuk ka qenë thjesht vullneti i një ministri për ta mbështetur këtë projekt. Ligji i menaxhimit të buxhetit në Republikën e Shqipërisë është një ligj teorikisht me standarte europiane.
Malaj thekson se kriza në qeverinë tonë është për shkak se qeveriset me vullnet personal dhe jo me ligj.
Arben Malaj: Kriza që ka qeverisja e vendit është se nuk qeveriset me ligj por me vullnet personal. Mua më vjen keq që punonjësit e Ministrisë së Financës që kanë detyrimin ligjor, të garantojnë përdorimin efikas të çdo qindarke, drejtuesit e kësaj nuk mund të justifikohen se këto që janë iniciativa sektoriale. Përzgjedhja e projekteve se ku shkojnë paratë, zbatimi i transparencës maksimale, për përdorimin e fondeve, zbatimi i konkurrencës së lirë, është detyrim kushtetues, i të gjithë institucioneve por në radhë të parë i Ministrisë së Financave. Kur përgatitet një ligj, çdo ministri ka përgjegjësinë e saj.
Malaj ndër të tjera thekson se: Nëse ministrat e Financës nuk i dalin për zot, por ulin kokën dhe miratojnë çdo kërkesë apo presion direkt apo indirekt, atëherë, jo vetëm që rritja ekonomike dëmtohet nga mungesa e konkurrencës, por rritet risku që borxhet e reja të keqpërdoren për rrugët, aeroportet apo për projekte të tjera.
Po ashtu Malaj thotë se nëse paratë e marra borxh përdoren pa përgjegjshmëri kushtetuese dhe profesionale kthehen nga burime zhvillimi në burime korrupsioni.
