Deputeti Belind Këlliçi u shpreh në protestën që po mbahet në bulevardin “Dëshmorët e Kombit” se Edi Rama mund ta mbajë Aleksandar Vuçiç si mik personal, por nuk mund ta shesi si mikun e shqiptarëve.
“Edi Rama sot do të jetë duke darkuar me vëllain e tij Vuçiç, ndërkohë që duhej të ishte këtu t´i kërkonte falje shqiptarëve që i ka vjedhur e varfëruar, që i ka detyruar të largohen nga Shqipëria.
Rama, ke hequr këpurdhën nga Kryeministria, por po ta themi ne nuk kemi punë me këpurdhat, por me ty, ti je hajduti i shqiptarëve, ti je ai që i vrave shpresën shqiptarëve”, tha Këlliçi.
Ai u shpreh se më në fund PD iu rikthye shesheve të protestave dhe do të ringrihet shumë shpejt atje ku i takon, në drejtimin e Qeverisë.
“Open Ballkan është një projekt që s´ka lidhje me rrugën e integrimit euro-atlantik të Shqipërisë. Ne mbështesim procesin e Berlinit dhe jo paktet Rama-Vuçiç”, tha Këlliçi.
Duke folur për aferën e inceneratorëve, ai kërkoi nga SPAK që ti shkojë deri në fund hetimeve, pasi kryehajduti është Edi Rama.
“Dy fjalë kam edhe për Erion Veliajn: nuk ta falim gjakun e Ardit Gjoklajt, pasi mbi gjakun e tij nisi edhe afera e inceneratorit të Tiranës. Do të përgjigjesh deri në një para drejtësisë për atë krim”, tha Këlliçi.
