Noti kuqezi vijon të dhurojë paraqitje pozitive në Kampionatin Botëror që po mbahet në Abu Dabi. Nikol Merizaj ia ka dalë të vendosë dy rekorde kombëtare pasi është pozicionuar në vendin e 36 nga 89 pjesëmarrës nga e gjithë bota, në garën e 50 metrave.
Në stilin e lirë , 25-vjeçarja vendosi kohën 25 sekonda e 40 të qindtat, duke siguruar në fund 735 pikë. Një paraqitje historike kjo për talentin shqiptar pasi dhe vetë objektivi i sportistes ishte pjesëmarrja në normën B dhe rezultatet në 50 metra stil i lirë dhe delfin e dërgojnë atë automatikisht një nivel më lartë.
Nga ana tjetër dhe 18-vjecari Kledi Kadiu regjistroi një paraqitje pozitive. Shtatlarti u pozicionua i 56 nga 100 garues në 100 metra stil I lirë, duke kapur kohën 50 sekonda e 22 të qindtat.
