Pas dy fitoreve radhazi, Vllaznia ndal vrullin në Abissnet Superiore. Skuadra e Brdariç nuk shkoi më shumë se një barazim pa gola përballë Dinamos në ndeshjen e luajtur në “Elbasan Arena” por dukshëm shkodranët ishin më superior dhe paten disa raste për të shënuar.
Në fakt pjesa e parë nisi me 2-3 raste më të mira për të shënuar për Dinamon ku në 11’, Demiri i vetëm përballë Zogoviç, e gjuan jashtë porte. Edhe në 29’, ekipi i Shkëmbit i afrohet golit me Mihanën e kësaj radhe portieri shkodran grushton.
Ne një pjesë të parë nën ritmin e duhur dhe të zakonshëm, Vllaznia shton presionin dhe është më ndryshe në pjesën e dytë.
Në 56’, Vllaznia pretendon për penallti por VAR e refuzon ndërsa në 76’ vjen rasti më i mirë kur Aralica me kokë vë në prove portierin Simoni që largon topin.
Në 82’ sërish i afrohet golit kur talenti Çoba godet dhe topi kalon fare pranë shtyllës.
Edhe minutat e mëpasshme janë më të mira për Vllazninë që nuk arrin të konkretizojë rastet e krijuara e në fund, vjen barazimi pa gola. Një rezultat që ndihmon më shumë Dinamon dhe jo ekipin shkodran.
