Pasi habiti të gjithë duke paguar 10 milionë euro për një djalosh kanadez të quajtur Alphonso Davies, Bayern Munchen ka bërë një tjetër blerje të papritur.
Kësaj radhe, drejtuesit e klubit gjerman kanë transferuar nga Kina një portier 18-vjeçar. Bëhet fjalë për Liu Shaoziyang, që luante me FC Wuhan Three Towns.
I riu kinez ka nënshkruar një kontratë deri në vitin 2025 me Bayern dhe do të luajë fillimisht me ekipin e të rinjve.
Çmimi i operacionit nuk është bërë i ditur, ndërsa Oliver Kahn, legjenda e portës gjermane, e ka shpjeguar kështu këtë blerje: “Ky transferim tregon që rrjeti ynë në Kinë funksionon, ai rrjet të cilin e kemi ndërtuar përgjatë viteve të fundit bashkë me të punësuarit tanë në zyrën e Shangait dhe ortakëve tanë në të gjithë Azinë”.
