Gjykata e Posaçme ka vendosur masën e sigurisë ‘arrest me burg’ për ish-ministrin e Mjedisit, Lefter Koka.
Ky i fundit ka mbajtur qëndrim mohues ndaj akuzave, ndërsa ka pohuar në sallën e gjyqit se ka zbatuar vetëm ligjin. Avokati i Kokës tha se klienti i tij nuk ka asnjë përgjegjësi penale.
“Koka nuk është pyetur asnjëherë, nuk ka si të jetë person në hetim. Ishte një proces politik, nuk është normale që një ish-ministër të arrestohet, pa u pyetur asnjëherë”, tha avokati mbrojtës. Sipas tij, masa e sigurisë e caktuar nga shkalla e parë e GJKKO do të Apelohet.
“Lefter Koka është krejtësisht i pafajshëm, akuzohet për shpërdorim detyre si ish ministër, por s’ka përgjegjësi për procedurat. Nuk u fol për përgjegjësi të të tjerëve. Koka nuk ka përgjegjësi për inceneratorin e Elbasanit.
Edhe për korrupsionin që flitet duhet të provohet a është bërë ky korrupsion?
Nuk është normale që të jetë person nën hetim pasi nuk është pyetur asnjëherë. Filimi i këtij procesi ishte politik nga kallëzimi dhe sot mora vesh që është bërë sërish një shtojcë tjetër në kallzim nga LSI”, tha avokati i Kokës.
Ish-zyrtari i lartë Koka, ministër në qeverinë ‘Rama 1’, rezulton nga hetimet e deritanishme të ketë ‘shpërdoruar detyrën’ gjatë procedurës së kontratës koncesionare, nga mungesa e dokumentacionit, deri në zbatimin e një procedure që nuk parashikohej në ligj.
Sipas SPAK, veprimet e kryera nga anëtarët e komisionit për dhënien e koncesionit në bashkëpunim me ish-ministrin Koka, si titullar i autoritetit kontraktor, kanë dëmtuar interesat e shtetit, si edhe i kanë sjellë përfitim të parregullt për shoqërinë ‘Albtek Energy’, që fitoi koncesionin.
Sa i përket veprës penale të ‘korrupsionit’ dhe ‘pastrimit të parave’, SPAK ngre dyshime për një ryshfet gati 3,8 milionë euro të përfituar nga ish-ministri Koka. Sipas Prokurorisë së Posaçme, në cilësinë e ish-ministrit të Mjedisit, Koka ka kërkuar, ka pranuar dhe ka marrë përfitime të parregullta monetare nga shoqëritë tregtare ‘Albtek Energy’ SH.P.K. që përfitoi koncesionit dhe ‘Integrated Technology Services’ SH.P.K., që zbatoi punimet për ndërtimin e impiantit të trajtimit të mbetjeve.
Gjithashtu, sipas SPAK, dy biznesmenët kanë përdorur një skemë fiktive të kryerjes së pagesave, për të maskuar origjinën dhe arsyen e transferimit të tyre.
Gjykata e Posaçme vendosi edhe sekuestro preventive mbi dy shoqëritë tregtare dhe pasuritë e dy biznesmenëve, si edhe pjesë takuese të aksioneve të ish-ministrit në një kantinë vere.
