Deputetja Jorida Tabaku, e cila ishte pjesë e takimit me 5 ambasadorë të akredituar në Tiranë, bashkë me Lulzim Bashën, Gazment Bardhin, Enkelejd Alibeajn, Alfred Rushajn dhe Grida Dumën, ka zbardhur detaje nga ky takim.
Tabaku tha se ky ishte një takim i përbashkët, i cili erdhi dhe në vazhdën e zhvillimeve në PD.
“Ambasadorët erdhën këtu për të diskutuar për situatën në të cilën ndodhemi. Ambasadorët mbajnë qëndrimet e tyre mbi zhvillimet në vend.
Ata erdhën për një takim zyrtar për Partinë Demokratike. Unë besoj që ndodhemi në një situatë ku nuk ka rëndësi që të përfshijmë asnjë palë të tretë.
Diskutuam për zhvillimet e fundit në PD dhe për të ardhmen e saj. Në interes të të gjithëve është një betejë e opozitës në Kuvend. Në fund të ditës të gjithë janë të interesuar që fokusi të jetë te kundërshtari ynë real, Edi Rama”, tha Tabaku.
Në vijim ajo tha se Kuvendi i 11 dhjetorit nuk ishte ligjor dhe as statutor.
“Kuvendi nuk pati asnjë procedurë statutore për verifikimin e mandateve. Nuk di të them për delegatët sepse nuk pati transparencë”, tha ajo.
