Nga Boldnews.al
Njëri me dridhje në zemës sapo ishte konfirmuar në detyrë, duke kaluar nga salla e vetingut, aty ku kolegët e tij ishin djegur edhe për “mosjustifikimin” e 9 metrave katrorë garazh. Me konfirmimin në detyrë, prokurori Isa Jata u rikthye në zyrë dhe ndër dosjet që prisnin pirg për tu dërguar në gjykatë, zgjodhi padinë penale të “grosistit të inceneratorëve”, Mirel Mërtiti kundër Boldnews.al. Dënim me 100 mijë lekë kërkoi me akuzën e stisur të “shpifjes”. Nuk kishte rëndësi vlera, por gjesti për të pastruar fytyrën e ndotur nga aferat e inceneratorëve.
Duhej edhe një gjyqtar për të dhënë verdiktin e fundit dhe me “goglat e shortit” fati i ra në duar gjyqtarit Besnik Hoxha. Të dy “burrat e drejtësisë” në fakt nuk dënuan për shpifje vetëm Boldnews.al, por edhe mediat në Afrikë që kishin hulumtuar për një aferë korruptive prej 60 milionë eurosh, duke shfaqur fotografinë e Mirel Mertirit.
Boldnews.al iu referua mediave në shtetin afrikan, por Hoxha i Gjykatës së Tiranës gjeti kohën ku të falej… Do i vijë radha për vetingun dhe “CV-ja” më e mirë që mund të shfaqin për “profesionalizmin” e tyre është sesa të zellshëm janë në vendimet pro qeverisë. Këtë Hoxha duket se e di mirë, pasi nëse do i referohet deklaratës së pasurisë e konsideron veten të pastër, ndonëse deklaron se ka ndërtuar një vilë tre kate me vetëm 5 milionë lekë. Po ashtu fuoristrada me targa amerikane që lëvizte Hoxha kushedi ku është zhdukur duke e përpirë tymi i çdo inceneratori në vend…
Sa për anën profesionale ka me çfarë të mburret para treshes së anëtarëve të KPK-së (Kolegjit të Pavarur të Kualifikimit). Hoxha do të tregojë sesi e plasi në burg një 50-vjeçar që hoqi këpucën dhe tentoi të godasë Edi Ramën. Ai burrë po mbronte shtëpinë, shtëpinë ia shembën, ndërsa për dhomë, qeveria por edhe gjyqtari i sajuan një qeli të errët.
Padyshim që edhe dënimin e një media do e ketë për referencë të rëndësishme, që më shumë se shuma është tentativa për ti mbyllur gojën çdo media të lirë në vend që ende mbetet në besimin se publiku ka nevojë për të vërtetën, edhe kur ka kundër Besnikët e Rilindjes.
Një prej çështjeve të bujshme, që qeveria kërkon të varrosë dhe djegë bashkë me plehrat janë qindra milionë euro të dhëna për ngritjen e inceneratorëve. Një aferë e dyshuar korruptive që nis që nga koha kur një aksident automobilistik në Maqedoninë e Veriut me drejtues ministrin e atëhershëm Arben Ahmetaj ku bashkë me të në të njëtën makinë udhëtonte edhe Mërtiti i inceneratorëve.
Fati e deshi që ata të mos bëheshin “martirë” në aksident dhe të kalonin me disa lëndime të vogla dhe si për të festuar darkën e madhe që i “Ruajti Përëndia”, gatuan aferën e inceneratorëve që edhe pa nisur punë kanë përpirë miliona euro. Nga ana tjetër SPAK është në gjumin letargjik, duke mbajtur mbyllur në “Kasafortën e Rilindjes” dosjen e inceneratorëve që ka 17 muaj që pret të hetohet.
Njerëzit e drejtësisë, prokurorë dhe gjyqtarë që e kanë kaluar vetingun apo presin ta kalojnë vetingun duket se mezi presin që të kenë në duar një çështje ku të pastrohet fytyra e çdo qeveritari të përfshirë në afera korruptive dhe më pas bshkë me inceneratorët të “djegin” edhe indiciet domethenëse për mosjustifikimin e pasurisë, integritetin moral dhe atë profesional.
