Ish-ministri dhe deputeti demokrat, Genc Pollo deklaroi këtë të Shtunë nga Kuvendi i PD se është përgjegjësi e demokratëve që ta kthejnë vendin në shinat e normalitetit kushtetues e demokratik.
“30 vjet më vonë koha në thërret sërish. Së pari askush nuk e zëvendëson dot të zotin e shtëpisë, as nuk mundet, e as nuk lipset për sa kohë duam njerëz të lirë. Së dyti, kemi hyrë në mandatin e tretë të një regjimi autokrat-kleptokrativ. Shqipërisë i nevojiten tre gjëra, opozitë, opozitë dhe opozitë. Zotërinj demokratë, jeni ju opozita, jemi ne”, u shpreh deputeti nga fjala e tij gjatë Kuvendit të PD-së, që po zhvillohet në “Air Albania”.
“Është përgjegjësi e jona të kthejmë Atdheun në shinat e normalitetit kushtetues dhe demokratik, që gjithkush të arrijë lumturinë e familjes së tij pa u penguar nga një regjim që po ndan pasuritë e kombit me 12 vete dhe po shtyn vendin në skamje e varfëri”, u shpreh Pollo.
“Ky Kuvend i mbledhur sot me vendimet e marra shënon pikën e kthesës historike. Me forcën e vullnetit dhe qartësinë e ndërgjegjes do ecim përpara, suksese dhe fitore”, përfundoi Pollo.
