Zona përreth Korçës, Devollit dhe Ersekës ka rezerva të mëdha të lëndës drusore. Duke filluar nga Prespa e përfunduar në kufi me Skraparin dhe Pogradecin, rrethi i Korçës është bërë pre e lehtë për të marrë lëndë drusore. Me apo pa leje, në rrugët kryesore shikon trajlera që kanë të ngarkuar pemë të prera.
Natyrisht, prej shumë vitesh, Shqipëria ka ende në fuqi një moratorium për pyjet. Madje, mijëra hektarë i kanë kaluar për “ruajtje” Ministrisë se Mjedisit, për disa zona dhe parqe të mbrojtura.
Megjithatë, ngritja e disa institucioneve të kota, apo edhe riorganizimi prej vitesh i AKZM-se, ARM,-së, apo edhe vetë Drejtorisë së Pyjeve, i ka lënë “rrugë” të lirë keqbërësve. Nisur nga kjo situatë, në rrugët e Korçës, por jo vetëm, shikon trajlera të mëdhenj me lëndë drusore.
Në redaksinë e Boldnews.al mbërriti një video denoncuese. Në këtë video shihet një trajler me lëndë drusore që qarkullon në aksin Korçë-Pogradec. Madje në një orar me qarkullim të madh automjetesh. Por, siç shihet edhe nga video denoncuese, pemët që janë ngarkuar janë të përmasave të mëdha.
Targa e trajlerit është AD R 538, ndërsa në momentin e lëvizjes së këtij mjeti në këtë aks nuk ka pasur asnjë patrullë policie. Të jetë rastësi?
BoldNews.al vetëm sa transmetoi këtë video denoncuese, ndërsa pas këtyre fakteve, lindin disa pyetje për policinë dhe për pronarët e trajlerit (nëse do të vijnë do të publikohen): Ku janë prerë këto pemë? A ka leje për prerjen e pemëve dhe në cilin vend? Kush e dha lejen, Bashkia apo Ministria? Përse nuk kishte patrulla policie në aksin Korçë-Pogradec nga ora 17.00-18.00, ose nëse ka pasur, përse nuk ishin në rrugë? /Boldnews.al/
