Strukturat doganore sekuestrojnë 1950 kg medikamente mjekësore kontrabandë në portin e Durrësit. Sipas autoritetit doganor, barnat ishin importuara në territorin doganor shqiptar si ndihma humanitare, duke shmangur taksat.
“Në bazë të analizës së riskut, autoritetet doganore ushtruan kontroll në automjetin me targa AA249NN, nga ku rezultoi se krahas mallrave të deklaruara, ishte dhe një sasi ilaçesh prej 1950 kg ose 8793 kuti me medikamente të ndyshme, të cilat kapin vlerën prej 119 mijë euro. Këto medikamente nuk dispononin dokumentacionin përkatës për importimin e tyre në territorin shqiptar, ndaj u sekuestruan. Vlera e detyrimeve doganore të shmanguara për mallrat e përshkruara më sipër kap shumën 2.979,455 lekë, ndërsa penaliteti për vlerën e detyrimeve të shmangura është në shumën 8.938,365 lekë. Në total, shuma e detyrimeve doganore dhe penaliteteve të shmangura është 11.917,820 lekë”, njofton dogana këtë të Premte.
Ndërkohë, u arrestuan nga policia për veprën penale “Kontrabandë me mallra të licencuara”, shtetasit A.B dhe A.P.
Materialet për rastin në fjalë janë referuar në Prokurorinë pranë Gjykatës së Shkallës së Parë Durrës, shtuan të njëjtat burime.
