Kreu socialist, njëherazi Kryeministër, Edi Rama, mbrëmjen e sotme ishte në Shkodër, atje ku ka zhvilluar një takim me strukturat e kësaj partie.
Përplasjet e krijuara mes socialistëve, përfshi edhe deputetët, që kanë pasur ankesa veçanërisht për ndarjen e pushtetin me PSD e Tom Doshit në këtë qark, duket se kanë detyruar Kryeministrin të takohet me strukturat.
Mësohet se takimi kishte për qëllim analizën e zgjedhjeve të 25 prillit dhe riorganizimin e PS.
Siç është shprehur vetë kryeministri, PS në Shkodër do të ketë një riorganizim nga zero, “ në përpjekje për të rregulluar gabimet e shkuarës duke synuar një rikthim dinjitoz siç i ka hije partisë politike më të madhe në vend”.
Bashkia e Shkodrës, është një nga 6 njësitë vendore, ku pritet të mbahen zgjedhjet e pjesshme vendore, pasi në detyrën e Kryebashkiakes vijon të jetë Voltana Ademi, mandati i së cilës ka përfunduar dy vjet më parë.
