Ish-ministri dhe deputeti demokrat, Genc Pollo shprehet se si kryeministri Edi Rama, ashtu edhe kryetari i PD-së Lulzim Basha, synuan të përdornin takimet me Escobar.
Sipas Pollos, Rama donte t’i shkëpuste diplomatit amerikan një fjalë në favor të Ballkanit të Hapur, ndërsa Basha donte t’i shkëpuste diplomatit amerikan një fjali kundër Berishës e kundër kuvendit partiak në 11 dhjetor.
Por të dy dështuan, shprehet ai.
“Si Rama ashtu edhe Basha synonin t’a përdornin vizitorin nga Uashingtoni. Rama donte t’i shkëpuste diplomatit amerikan një fjalë në favor të Minishengenit/Ballkan-Hapu. Basha donte t’i shkëpuste diplomatit amerikan një fjali kundër Berishës e kundër kuvendit partiak në 11 dhjetor. Por ndryshe nga ndonjë deklaratë e thënë shkarazi muaj më parë, diplomati amerikan zgjodhi të mos shprehte përkrahje për nismën Vuçiç-Rama; gjithashtu ai e pa me vend të mos deklaronte asnjë kritikë ndaj mazhorancës stërmadhe të demokratëve dhe institucioneve legjitime të Partisë Demokratike. Rama e Basha dështuan”, shkruan Pollo në një postim në rrjetet sociale.
Gabriel Escobar, zv.Ndihmës Sekretari i Shtetit të SHBA dhe i Dërguari i Posaçëm për Ballkanin Perëndimor zhvilloi një ditë më parë një vizitë zyrtare në Shqipëri, ku u takua me kryetarin e PD-së Basha, kryeministrin Edi Rama dhe ministren e Jashtme Olta Xhaçka.
