Deputetja Dhurata Çupi, e ka konsideruar Kuvendin Kombëtar të ditës së nesërme si tubim të demokratëve, ndërsa shton se legjitim është Kuvendi i 18 dhjetorit pasi sipas saj është thirrur me dakordësinë e shumicës së anëtarëve të kryesisë.
Këtë deklaratë e bëri në një intervistë për Ora Neës, me gazetaren Matilda Mcini, ndërsa duke iu referuar ish-Kryeministrit Sali Berisha shprehet se demokratët nuk mund të përdoren për interesa personale.
Dhurata Çupi: Na ndajnë rreth një javë nga Kuvendi Kombëtar i PD, Kuvendi i thirrur me vendimin e Kryesisë së PD. Me shumicën e anëtarëve të kryesisë të PD, me kërkesën e shumë demokratëve për të bashkëbiseduar dhe me vullnetin e tyre për të bërë një Kuvend ku të bashkohemi dhe jo të përçahemi. Në Kuvend ku t’I japim dinjitet çdo demokrati që merr pjesë në Kuvend. PD ka Kuvendin më datë 18 dhjetor dhe askush nuk ndalon që demokratët të bëjnë tubime apo takime politike. PD është një parti e themeluar në 31 vite, është një parti që ka statutin, ka drejtuar shtetin në një shumicë të viteve të saj. Mos të tallemi me qytetarët dhe të mos përdorim qytetarët për interesa personale. Ne duhet t’i shërbejmë PD dhe jo ta shfrytëzojmë sa herë që na duhet.
E pyetur se përse u thirr Kuvendi i 18 dhjetorit pasi Berisha kishte caktuar datën 11 dhjetor, Çupi tregoi arsyet se përse vendosën mbledhjen e Kuvendit Kombëtar.
Dhurata Çupi: Basha është kryetar i PD dhe Basha nuk shkon pas agjendës të Berishës. Kjo është vendimmarrje e Kryesisë në shumicën e saj. Është vendosur që të thirret Kuvendi më 18. Ne gjykuam që pas diskutimeve dhe kërkesave të anëtarëve. Ne nuk mund ta fshehim aspektin delikat pas 9 shtatorit që lindën marrëdhëniet midis demokratëve në PD. Dhe për t’i hapur rrugë kësaj, për të bërë një Kuvend zyrtar që të njihet, për t’iu përgjigjur kërkesave të demokratëve që kërkonin Kuvend, ne lamë një datë që gjykuam të përshtatshme.
