Roan Brahimi, një prej tre personave të përfshirë në ngjarjen e ndodhur në Lezhë, ku hynë të maskuar dhe të armatosur në një lokal më 13 Nëntor, rezulton i arrestuar për armëmbajtje pa leje më 15 Maj 2018. Por pavarësisht kësaj, 28-vjeçari i shpëtoi dënimit me burg për këtë ngjarje, madje doli nga qelia fill pas arrestimit.
Me armë dhe euro në makinë
Në vendimet e gjykatave për Brahimin, sqarohen dhe rrethanat e arrestimit të tij: Rreth orës 14.00 të datës 15.5.2018, shërbimet e policisë, në aksin rrugor Lezhe-Milot, në pjesën që kalon përballë “Auto Sallon Miftari”, kanë ndaluar dhe ushtruar kontroll mbi mjetin tip “Lancia” (në pronësi të E.K.) që drejtohej prej të pandehurit Roan Brahimi dhe në një çantë dore tip borsetë që ndodhej tek pjesa e këmbëve të sediljes së pasagjerit kane gjetur dhe sekuestruar një arme zjarri pistoletë e llojit “Beretë” me nr.PJ19045 në krëhërin e të cilës ndodheshin 15 fishekë. Në kroskotin e mjetit është gjetur një qese plasmasi ne brendësi të së cilës ndodheshin 14 600 euro bashke me një sasi bizhuterish të cilat janë sekuestruar prej policisë.
Gjatë procesit, i riu është gjykuar në masën e arrestit shtëpiak (e vendosur nga Gjykata e Lezhës 3 ditë pas arrestimit) e më tej detyrim paraqitje (masë e dhënë më 29 Qershor).
Sqarohet se autori ka pranuar krimin ka shprehur pendesë dhe në përfundim të procesit është dënuar vetëm për veprën penale armëmbajte pa leje (Për pastrim parash, prokuroria kërkoi pushimin e hetimeve, ndërsa gjykata e ktheu për rihetim). Më 4 Mars 2019, gjyqtari Ilir Perdeda dha dënimin me dy vite burgim për të pandehurin, i pa dënuar më herët deri në këtë moment. 28-vjeçari përfitoi nga gjykimi i shkurtuar.
Apeli rrëzon burgun
Vendimi i shkallës së parë është lehtësuar në Apel. Më 11 Dhjetor 2019, gjyqtarja Valbona Vata la në fuqi vendimin e shkallës së parë, por aplikoi pezullimin e dënimit me burgim. Ajo vendosi që për një periudhë prej 4 vite, Roan Brahimi të mos kryejë vepër tjetër penale dhe të mbajë kontakte me Zyrën Vendore të Shërbimit të Provës Lezhë.
/BoldNews.al/
***
Lexo edhe:
Të armatosur në një lokal në Lezhë, një prej autorëve nipi i deputetit socialist
