Nënkryetari i Lëvizjes Socialiste për Integrim, Petrit Vasili ka reaguar pas publikimit të vendimit të Gjykatës Kushtetuese për zgjedhjet lokale të 30 qershorit 2019.
Sipas Vasilit, me këtë vendim Kushtetuesja degradoi, duke u kthyer në një zyrë të qeverisë që thjesht zbardh vendimet e saj.
“Gjykata Kushtetuese katandiset në zbardhëse të asaj, që kërkon qeveria! Gjykata Kushtetuese në vendimin e saj për Zgjedhjet Lokale të 30 qershorit 2019 degradoi në mënyrë të turpshme thjesht dhe vetëm në një zbardhëse të kërkesës së Qeverisë. Lexoni se sa trashë është marrë ky vendim, duke e shndërruar Gjykatën Kushtetuese në një zyrë të qeverisë, që thjesht zbardh vendimet e kësaj të fundit. Mjerim i madh vërtet”, shkruan Vasili në rrjetet sociale.
Një ditë më parë, në vendimin e Gjykatës Kushtetuese shkruhej se kjo gjykatë nuk ka kompetencë për të shqyrtuar vlefshmërinë e proceseve zgjedhore.
Gjykata nënvizon se ligjshmëria e procesit ankimohet në Kolegjin Zgjedhor duke hedhur poshtë pretendimet e palës paditëse. Për më tepër, Gjykata vlerëson se shoqata e bashkive nuk është palë që mund të vërë në lëvizje trupën kushtetuese.
