Berisha akuza të forta Bashës: Po hetohesh në Belgjikë si anëtar i grupit kriminal “Toyota Yaris”

Ish-Kryeministri Sali Berisha u shpreh sot se pas 4 humbjeve rradhazi, kreu i PD-së, Lulzim Basha, duhej të jepte 4 herë dorëheqjen.

Berisha e konsideroi Bashën një peng kryetar, duke shtuar se faktet po dëshmojnë çdo ditë e më shumë vetëm këtë.

“Kreu i opozitës me dosjet e tij të krimit është pjesë e narkoshtetit. I kam kërkuar Bashës të japë shpjegime për dosjen Toyota Yaris dhe për dosjen Muzin, sikundër e garantoj se projekti arab në portin e Durrësit nuk do të zhvillohet kurrë.

Pse nuk e jep Basha dorëheqjen? Sepse është peng Kryetar. Ai ka humbur çdo betejë me Edi Ramën, me përjashtim të ligjit për dekriminalizimin.

E pyeta për denoncimin që bëri për Toyota Yaris dhe i them si e dekonspirove operacionin? Ky ishte dështim i operacionit, por më tha se e ndjekin me GPS dhe në fakt ato erdhën, por ato që duhej të dilnin për ti pritur në port nuk dolën.

Hapet dosja, dhe për të gjithë atë aferë dënohet vetëm 1 person. Çfarë do të thotë kjo? Kjo do të thotë se Edi Rama i mbylli dosjen e Tiranës, por në Belgjikë nisën hetime dhe atje Rama nuk mundi ta mbyllte atje hetimin.

Bazuar në dokumentet autentike, Ministria e Drejtësisë i ka hapur dritën jeshile hetimeve ndaj Lulzim Bashës në 2019, bazuar në kërkesën e drejtësisë belge. Drejtësia belge ka kërkuar marrjen me forcë në pyetje ndaj Bashës dhe procedimin penal. Jep dorëheqjen, mos u fshih pas dosjeve të tua. Edi Rama të ka mbajtur peng me dosjen në Shqipëri, por me dosjen në Belgjikë je shpallur anëtar i organizatës kriminale”, tha Berisha.

Pjesë nga fjala e Berishës në Devoll

“Në fillim të kësaj lëvizje ju deklarova dhe e quajta atë peng-Basha, peng-kryetari. Kurrë nuk e etiketoja pa patur bindje absolute se ai i tillë ishte dhe faktet dëshmuan të njëjtën gjë. Faktet po dëshmojnë vetëm këtë. Nëse në Shqipëri është vendosur narkoshteti, për fat të keq kryetari i dosjet e tij të krimit është aksioner i këtij shteti. Në Foltore të ndryshme kam denoncuar dhe i kam kërkuar të japë shpjegime për ‘Toyota Yaris’, për dosjen ‘Muzin’. E garantoj se me radhë doi të dalin dosje të tjera dhe e garantoj se projekti i Emirateve në Durrës nuk do të realizohet kurrë sa të jeptë PD forca më e fuqishme e vendit.

LEXO EDHE  Moti sot/ I ftohti mbërthen vendin, çfarë ndodh me temperaturat

Ish-ministri ynë i Brendshëm deklaron një ditë në Parlament se do të vijnë me Toyota 5 mln euro dhe do t’i presë Taulant Balla. Deklaratë që të dukej fantazi në pamje të parë. E pyes si e bërë ti zotëri këtë deklaratë. Tha është e sigurtë që do të vijnë… Nëse është e sigurt, si mund të dekonspirosh operacionin, i thash, se ti futesh në vorbullën e organizatës kriminale, se kjo deklaratë është paralajmërim për ata që do të vijnë. Janë me GPS tha. Ato erdhën, por ata që i prisnin nuk dolën. Ata ikën. Hapet dosja, merret në pyetje peng kryetari dhe për të gjithë atë aferë dënohet vetëm një njeri. Edi Rama i mbylli dosjen peng kryetarit. Por dosja i kishte rrënjët në Belgjikë.

Kishin nisur hetimet atje dhe atë dosje nuk ia mbyllte dot Edi Rama. Këto kohë gazetarët zbulojnë dokumente autentike në të cilat Ministria e Drejtësisë e Shqipërisë jep dritën jeshile për ndjekjen penale të Lulzim Bashës me kërkesë të autoriteteve belge. Ka ndodhur në 2019, ka vazhduar në 2020 dhe 2021. Tani fjala është e drejtësisë belge, të cilët e kishin marrë në pyetje njëherë e kishte thënë do të flas përpara drejtësisë belge. Por drejtësia belge nuk kontrollohet nga Edi Rama dhe kanë kërkuar marrjen me forcë dhe ndjekjen penale. I them jep dorëheqjen dhe mos u fshih pas dosjeve të tua. Edi Rama të ka mbajtur peng me dosje në Shqipëri, por me dosje në Belgjikë rezulton i shpallur anëtar i organizatës kriminale”.