Kryedemokrati Lulzim Basha i ka quajtur sensacione mediatike takimet e organizuara nga ish-kryeministri Sali Berisha. I ftuar në emisionin “Real Story” në News 24, Basha u shpreh se diskursit të opozitës po i mbivendoset interesi i një personi.
“Është detyra ime që asnjë institucion i PD-së të kthehet në një forum që shqyrton vendimet e qeverisë amerikane. Shqiptarët kanë halle të tjera, ekonomia është e shkatërruar. Kryeministri dhe 6 oligarkë diktojnë çdo pasuri të Shqipërisë, familjet shqiptyare janë më të varfërat në ballkan dhe kemi muaj që merremi me sensacione mediatike. Ndërkohë PD ka marrë disa nisma, hetimin e 25 prillit, uljen e TVSH-së, dhe gjithë këtij diskursi normal i opozitës i mbivendoset sensacioni i një personi”- tha ai.
Basha ka treguar gjithashtu se çfarë i kanë thënë zyrtarët ameriknë në zyrë.
“Në takime zyrtare prej ditës së parë qoftë me ambasadoren apo zyrtarë të lartë amerikanë kam ngritur në veçanti me të njëjtat terma dhe revoltë kërkesën për shpjegime. Zgjodha të bëj një fushatë model pa aleancë me krimin, papritur një figurë e PD-së i jepet një goditje që ne e përjetojmë si një goditje të PD-së. Përgjigja ka qenë e dyfishtë: “Ne nuk kemi asgjë me PD-në. Ne duam një PD të fortë. Vendime të tilla nuk merren sot më sot, kalojnë në një filtër të gjatë kohor dhe pasi shteti amerikan ka konfirmuar në mënyrë përfundimtare akuzat”- kjo ka qenë përgjigja. Duhet të kuptoni 2 gjëra. Unë nuk mund të ndikoj në një vendim të tillë. Detyra imë është të mbroj interesat e PD-së”- tha ai.
