Gjykata Kushtetuese ka zbardhur sot vendimin e plotë për zgjedhjet lokale të 30 qershorit, duke rrëzuar kërkesën për ta shpallur procesin si antikushtetues.
Vendimi është marrë me votë unanime, por një anëtare, Sonila Bejtja ka paraqitur mendim ndryshe.
Për rrëzimin e kërkesës për shpalljen antikushtetuese të zgjedhjeve kanë votuar Vitore Tusha, Elsa Toska, Marsida Xhaferllari, Altin Binaj, Përparim Kalo, dhe Fiona Papajorgji.
Vendimi prej 35 faqesh paraqet qëndrimet mes palëve në proces, si dhe Opinionin e Venecias, që i ishte kërkuar nga vetë Kushtetuesja.
Në atë që trajtohet si mendimi ndryshe, ose i pakicës, anëtarja e Kushtetueses, Sonila Bejtja, thotë se ngjarjet para zgjedhjeve, duke nisur nga djegia e mandateve dhe bojkoti përbëjnë “mosmarrëveshje kushtetuese”.
Sipas saj, procesi zgjedhor në këto kushte, “përbën mohim të së drejtës së votës dhe cenim të së drejtës kushtetuese për votë të barabartë, të lirë dhe të fshehtë”, duke argumentuar faktin se në 31 bashki pati vetëm një kandidat.
Anëtarja Sonila Bejtja thekson se Gjykata Kushtetuese ka juridiksion që të shqyrtojë një mosmarrëveshje të tillë por “kërkesa nuk është paraqitur nga një prej subjekteve që legjitimohen për ta vënë në lëvizje atë”.
Kërkesa në Gjykatën Kushtetuese u paraqit nga Shoqata e Bashkive, por Kushtetuta përcakton se për të vënë në lëvizje gjykatën kjo duhej bërë nga “subjektet e përcaktuara nga vetë Kushtetuta si të tilla që të mund të kërkojnë gjykimin e një mosmarrëveshjeje kushtetuese”.
Gjykata Kushtetuese vihet në lëvizje me kërkesë të Presidentit të Republikës, Kryeministrit; jo më pak se një të pestës së deputetëve, Avokatit të Popullit ose Kryetarit të Kontrollit të Lartë të Shtetit.
