Deputeti i PS-së Erion Braçe propozoi që vaksinimi kundër Covid në vend, të bëhet i detyruar.
“Doza të mbërritura në Shqipëri 2.2 milionë kemi një stok prej 550 mijë dozash tani që flasim, ndërkohë që virusi qarkullon masivisht tek të pavaksinuarit, ndërkohë që ne vazhdojmë të kemi stok e sot do të miratojmë një marrëveshje për të blerë të tjera vaksina. Po çfarë vlere ka, kur në krahun tjetër nuk po vaksinojmë në ato shifra që duhet. Na duhet rienergjizim total i procesit të vaksnimit. Po humbim kohë, duhet të kushtëzojmë të gjithë aktivitetet me vaksinim. Vaksinim me detyrim për çdo lloj aktiviteti. Do të mbash klubin hapur, restorantin hapur? Vaksino punonjësit. Në restorant prit vetëm ata që janë të vaksinuar. Duke nisur nga kjo sallë në çdo zyrë të shtetit e administratës”, tha Braçe nga foltorja e parlamentit.
Ai tha po ashtu se në vend nuk zbatohet masat anti-Covid, duke nisur nga qeveritarët.
“Masat në këtë vend nuk zbatohen më duke nisur nga kjo sallë. Sipas rregullave këtu duhet të mbahet maskë. Që parë pashë kryeministrin e disa ministra, nuk bëhen as 5 deputetë bashkë që mbajnë maskë. Po të dalësh në klubin e parlamentit jo vetëm që nuk kanë maskë, por dikush mendon që tymi i duhanit të mbron nga virusi. Dhe ky është një problem ende më i madh. Dhe kur nuk zbatohen masat e rregullat këtu në sallën e parlamentit as mos të kërkojë kush të zbatohen masat në çdo cep të Shqipërisë. Masat nuk zbatohen asgjëkundi. As në shesh, as në Panair e as në Stadiume”, tha ai.
