Drejtori i Përgjithshëm i Policisë së Shtetit, Gledis Nano, u paraqit sot para Komisionit parlamentar të Sigurisë, duke paraqitur disa shifra lidhur me gjendjen e sigurisë në vend dhe nivelin e kriminalitetit.
Nano u thirr në Komision nga deputetët e PD-së, pas ngjarjes së rëndë të ndodhur në Fier, ku u vra dhe u gropos një fëmijë 8-vjeçar. Kryepolici tha se lidhur me ngjarjen e Fierit, autori kishte precedentë të mëparshëm penalë, kishte përfunduar dënimin, por më pas nuk kishte informacione lidhur me vepra penale që ai mund të kishte kryer.
Kryepolici tha se po punohet për zbardhjen e vrasjeve pa autor, ndërsa shprehu shqetësim për rritjen e rasteve të dhunës në familje. Madje, Nano tha se 30 % e vrasjeve këtë vit lidhen pikërisht me dhunën në familje.
Lidhur me krimet seksuale, Nano tha se janë 67 raste kur të dëmtuar kanë qenë të mitur.
Nano tha se deri më 31 tetor 2021, ka pasur në total 27733 vepra penale.
Sipas tij, 10.7% ka rënë krimi i organizuar dhe korrupsioni, por ka pasur rritje dhe të veprave penale të dhunës në familje.
Nano tha se krime kundër personit janë 9% dhe ato të dhunës në familje 4%.
Sipas shifrave të bëra publike nga Nano, 2160 vepra penale janë zbuluar për krime ndaj personit.
“Pastrimi parave, 400 vepra janë zbuluar, kemi 8.5% vepra penale më shumë. Akte terroriste kemi 1.5% vepra penale më shumë.
94.2% e krimeve janë zbardhur dhe krahasuar me 1 vit më parë kemi 5.5% vepra penale më shumë”, tha ai.
